Апертура нима?

«Бу нима?» рукни давом этади. Ҳозирга қадар камералардаги мегапиксел ҳақида маълумот берган эдик, энди эса апертура ёки диафрагма нима эканлигига тўхталиб ўтамиз.

Оптика ва фотография соҳаларида апертура ёки диафрагма тушунчаси объективга ёруғлик ўтказадиган туйнук маъносини билдиради.

Фотографияда апертура
Фотографик линза апертураси апертура ҳалқаси воситасида турли ҳажмларга мослаштирилиши мумкин бўлган туйнук ҳисобланади. Ҳалқа объектив ортида, затвор (лўкидон) дан олдинда жойлашган бўлади. Апертура ҳалқаси ясси ҳалқа бўлиб, унинг марказида кичик туйнук бўлади. Мана шу кичик туйнук апертура ёки диафрагма деб аталади. Апертура ҳажми ўзгартирилиши мумкин. Апертура кичик бўлса, объективга ўтадиган ёруғлик миқдори кам бўлади. Апертура катта бўлса эса, линзага кўпроқ ёруғлик тушади.

Бу эса фотографга фотоплёнкага ёки расм датчигига тушадиган ёруғлик миқдорини назорат қилиш имконини беради. Камерага кирадиган ёруғлик миқдорини назорат қилиш учун апертура ҳажми затвор тезлиги билан бир вақтда ўзгаради. Камерага тушган ёруғлик миқдори экспозиция дейилади. Одатда, затвор тезлиги юқори бўлса, камерага унча ёруғлик кирмайди ва тасвир қора бўлиб чиқиши мумкин. Фотограф бунинг олдини олиш учун каттароқ апертурадан фойдаланади. Агар затвор тезлиги секин бўлса, камерага кираётган ёруғлик ўта кўп бўлмаслиги ва натижада тасвир ҳаддан ташқари ёрқин чиқмаслиги учун кичикроқ апертурадан фойдаланишга тўғри келади.

Апертура ҳажми «f-рақам» шаклида кўрсатилади. Бу рақам туйнук ҳажмининг объектив фокуси узунлигига нисбатини ифодалайди. Кичик рақам (масалан, f/1.4 ёки f/2.8) апертура тўла очиқлигини ва кўп ёруғлик ўтказишини билдиради. Катта рақам (масалан, f/8 ёки f/11) эса апертура кичик эканини ва унчалик кўп ёруғлик ўтказмаслигини кўрсатади.

ЎҚИНГ: IP даража нима?