Apple 10 дюймли янги iPad Pro тақдимотини ўтказди

Apple компанияси ўзининг 10 дюймли iPad Pro планшетини намойиш қилди. iPad ва бошқа янги қурилмалар тақдимоти 21 март куни АҚШда бўлиб ўтди.

Маросимнинг бош қаҳрамони iPhone SE смартфони ҳақида аввалги хабаримизда батафсил ёритдик. Унда смартфоннинг ташқи кўриниши iPhone 5s ва iPhone 6s`ни эслатиши айтилган бўлса, янги iPad Pro планшети янгиланган қиёфага эга экани маълум қилинди. Эътиборлиси, илк маротаба iPad пушти рангларда ишлаб чиқариладиган бўлди.

Ажойиб экран

iPad дисплейида янгича технологиялар қўлланилган. Унга ёруғлик даражасини таҳлил қилиш учун буткул янги сенсорлар ўрнатилган. У муҳитга яхшироқ мослашиб, нафақат ёруғлик даражасини, балки ранглар қуюқлигини ҳам барқарорлаштиради.

Динамика

Янги iPad Pro планшетида овоз чиқарувчи карнайлар сони тўрттани ташкил этади. Аввалги iPad Air моделида улар иккита эди. Бу эса овознинг ҳажмдорлигини ошириб, планшетни тўлақонли мусиқий қурилмага айлантиради.

Камера ва чақноқ

Планшетдаги асосий камера бир оз олдинга илгарилаган бўлиб, 10 мегапикселни ташкил этди. iPad Air 2 планшетида эса бу кўрсаткич 8 Мп эди. Шунингдек, олд камера 5 Мп бўлди.

Орқа панелда асосий камера билан чақноқнинг ўрнатилган кўпчилик “олма” ишқибозларини хурсанд қилса керак. Чунки эндиликда планшет ёрдамида кам ёритиладиган жойларда янада тиниқроқ суратларни олиш мумкин бўлади.

Техник хусусиятлари

iPad Pro A9X процессорилари асосида бунёд этилди. Компания тезкор хотира ҳажми ҳақида маълум қилгани йўқ, бироқ у катта iPad Pro`даги каби 4 Гб бўлиши мумкин.

Экран 2048х1536 пикселлар қатори ёки бир дюймда 264 нуқтадан ташкил топган. Қўшимча раившда тасвирларни табиий ранг ва ёруғлигида кўрсатиб берадиган True Tone режими ёқилади.

9,7 дюймли янги iPad Pro 12 дюймли планшетдаги барча техник хусусиятларга эга бўлиб, бундай диагоналдаги маҳсулотлар учун биринчи марта Pencil технологияси ҳам қўлланилди. Эндиликда ушбу “ручка” ёрдамида планшетда график тасвирларни чизиш мумкин.

Планшетга энг сўнгги iOS 9.3 операцион системаси ўрнатилган.

Ҳажми

Ўз ҳажми билан янги iPad Pro йирикроқ турдошидан бир оз камтарин кўринади. Узунлик, кенглик ва қалинлик мутаносиблиги қуйидагича – 240х169,5х6,1 мм. Қурилманинг вазни эса ярим килограммга яқин – 437 грамм.

Нарх-наво

Планшетда iPad учун илк маротаба 256 Гб доимий хотира ўрнатилган бўлиб, бундай талқиндаги ускуна баҳоси 900 долларни ташкил этади. Оммавийроқ 32 Гб талқини (фақатгина Wi-Fi билан ишлайди) эса 599 доллар турса, 128 Гб хотирага эга планшетни 749 доллардан сотиб олиш мумкин.

Қурилмага 24 мартдан олдиндан буюртма бериш бошланади. 31 мартдан эса маҳсулотлар ўз харидорларига етиб боради.