Apple 8 миллиард доллар жарима тўлаши мумкин

Евроиттифоқ Apple компанияси фаолияти бўйича суриштирув бошлади ва компания 8 миллиард АҚШ доллари миқдорида жаримага тортилиши мумкин. Бу ҳақида Bloomberg агентлиги маълум қилган.

Нега Apple`дан шубхаланишмоқда?

Суриштирувнинг асосий сабаби сифатида Apple компаниясининг солиқ сиёсати келтирилган. Янада аниқроғи, корпорациянинг Ирландияда фаолият олиб бораётган тармоғи даромад солиқларини тўлашдан бўйин товлаганликда гумон қилинмоқда.

Якуний қарор қачон чиқарилади?

Маълумотларга кўра, мазкур суриштирув бўйича якуний қарор жорий йилнинг март ойида қабул қилиниши мумкин. Агар Евроиттифоқ Apple компанияси учун солиқ тўлаш тартибини янада кучайтирса, даромаддан олинадиган солиқ ставкаси 2004-2012 йиллардаги фойдага нисбатан 12,5 % фоиз қилиб белгиланиши эҳтимоли бор. Агентликнинг маълум қилишича, компания 2004-2012 йиллар мобайнида 64 миллиард АҚШ доллардан зиёд фойда кўрган. Агар шубхалар расман ўз тасдиғини топса, Apple катта миқдордаги маблағидан воз кечишига тўғри келади.