Apple янги ақлли соати билан термометрга хайр деймиз!

Apple ўзининг Watch Series 7 смартсоатларини тақдим қилганига эндигина олти ой бўлганига қарамай, интернетда аллақачон унинг давомчиси ҳақида маълумотлар тарқалиб улгурди. Миш-мишларга кўра, компаниянинг янги ақлли соатларига тана ҳароратини ўлчай оладиган сенсор қўшилиши мумкин.

Таниқли таҳлилчи Минг-Чи Куонинг айтишича, купертиноликлар термометр хусусиятини Watch Series 7 қаторига қўшмоқчи бўлишган, лекин алгортимлар Apple талабларига жавоб бермагач компания бу фикрдан қайтган.

"Тана ҳароратини аниқ ўлчашни амалга оширишдаги қийинчилик шундаки, терининг ҳарорати ташқи муҳитга қараб тез ўзгаради. Ақлли соат аппарат нуқтаи назаридан асосий ҳароратни ўлчашни қўллаб-қувватламайди, шунинг учун у биргаликда ишлаш учун мукаммал алгоритмга муҳтож." дейди таҳлилчи Куо.

Шундай қилиб, агар Apple алгоритмларни юқори даражада тўғри ишлашига эриша олса, биз 2022 йил иккинчи ярмида тақдим қилиниши кутилаётган Watch Series 8 смартсоатлари билан ўз тана ҳароратимизни ўлчай оладиган бўламиз.

Шунингдек, Куонинг сўзларига қараганда, Samsung ҳам худди шундай қийинчиликка дуч келмоқда ва шу сабаб компаниянинг янги авлод Galaxy Watch ақлли соатлари термометр хусусиятига эга бўлмаслиги мумкин.

ЎҚИНГ: Galaxy Watch 5 сериясида Classic моделни кўрмасангиз ҳайрон бўлманг!