Apple арзон iPhone 7 ва iPhone 7 Plus сота бошлади
5,5 дюймли Retina HD дисплейи, 12 Мп асосий камера ва 7 Мп олд камера, сув ва чангддан ҳимоя корпус, янгиланган «Home» тугмаси, стереодинамикалар, аввалгисидан 40% тезроқ ишлайдиган A10 Fusion процессори, 3,5 мм ҳажмидаги аудио туйнукдан маҳрум бўлиши, узоқ муддатга етувчи аккумулятори билан, ўз вақтида машҳур бўлиб кетган iPhone 7 модели арзонлаштирилган нархларда сотувга чиқарилди.
Apple ҳар йили қайта тикланган айфонларни расман сотувга чиқаради. Анъанага кўра, навбат 2016 йилда тақдим қилинган iPhone 7 ҳамда iPhone 7 Plus флагманларига келди. Ўлчами ва камералари билан бир-биридан фарқланадиган бу айфонлар ҳали ҳам техник жиҳатдан кучли ҳисобланади.
Refurbished, яъни қайта тикланган iPhone — бу носозлик боис савдодан қайтган, Apple томонидан қайта йиғиб олинган ва созланган смартфонлар. Бу каби айфонларга ҳам сотилаётганда янгилари каби бир йиллик кафолат берилади.
Қайта тикланган айфонларга компания қўйган нархларни эълон қиламиз.
iPhone 7
32 ГБ — $499 (янгиси -- $549)
128 ГБ — $589 (янгиси -- $649)
256 ГБ — $679 (компания сайтида мавжуд эмас)
Мавжуд ранглари: қора, хира тусли қора, кумуш, тилла ранг ва пушти.
iPhone 7 Plus
32 ГБ — $599 (янгиси -- $669)
128 ГБ — $689 (янгиси -- $769)
256 ГБ — $779 (компания сайтида мавжуд эмас, бироқ расмий дўконларда $969)
Мавжуд ранглари: қора, тилла ранг ва оч пушти ранг.
Apple компанияси томонидан тасдиқланишича, барча сотувга чиқарилган бу iPhone моделлари синчиклаб текширилган ва тўлиқ созланган, синовдан ўтказилган ҳамда янгилари каби қадоқланган, қўлланма ва барча аксессуарлари билан сотувга чиқарилган.
Компания қайта тикланган айфонларга батарея ва корпусни ҳам бошқатдан ўрнатади ва уларни янгисидан ажратиб олиш қийин.
Ҳозирча бу каби айфонлар фақат АҚШ да сотувга чиқарилган. Тез орада бошқа смартфон бозорларида ҳам сотила бошлаши кутилмоқда.
iPhone 7 Plus худди шу сиғимли 2 та бош камер объективи билан таъминланган. Қўш камералардан бири кенг бурчакли сурат олса, бошқаси фокусни ўрнатадиган телеобъектив вазифасини бажаради.
iPhone 7 Plus камерасидаги 2-модулда объектни 10 мартагача яқинлаштириш мумкин бўлган «рақамли зум» технологияси татбиқ этилган. Шу билан бирга, сурат сифати сақлаб қолинади.
Эслатиб ўтамиз, iPhone 7 ва 7 Plus смартфонлари 2016 йилнинг 16 сентябрида сотувга чиқарилган. iPhone 7’нинг оддий талқини 649 АҚШ доллардан, iPhone 7 Plus эса сотувга $769 доллардан чиқарилган эди.
Шу ўринда савол туғилади: янги ва қайта тикланган айфонни қандай ажратиш мумкин?
Агар iPhone моделининг рақами ‘M’ ҳарфи билан бошланган бўлса, бу -- янги айфон бўлади. Агар модел рақами ‘F’ билан бўлса, бу қайта тикланган айфон бўлади.
Модел рақамини аниқлаш учун "Созламалар менюси"га киринг: Settings > General > About. Шунда пастроққа тушиб, "Model section" га киринг. Бу ерда 9 та рақамли кодга дуч келасиз.
