Apple бугун қизил рангли iPhone 8'ни тақдим этиши мумкин
MacRumors нашрининг ёзишича, Apple 9 апрел куни, яъни бугун қизил рангдаги iPhone 8 ва iPhone 8 Plus'ни тақдим қилиши лозим. Ушбу смартфонларга жило бериши кутилаётган янги - қизил ранг Apple'нинг Африкада ОИТС касаллигига қарши курашувчи RED (Қизил) хайрия ташкилоти билан ҳамкорлиги доирасида юзага чиқмоқда.
Хабарда айтилишича, янги қизил iPhone 8'ларга бугундан буюртма бериш имконияти пайдо бўлиши мумкин. iPhone Х'нинг ҳам қизил рангдаги талқини чиқариладими ёки йўқми, бу ҳали маълум эмас.
Apple'нинг қизил рангдаги қурилмалари Қора Қитъада давосиз касалликларга қарши курашаётган юқоридаги хайрия ташилотини қўллаб-қувватлаши кўзланган. Apple мазкур ташкилот билан 2012 йилдан бери ҳамкорлик қилиб келади. Ҳамкорлик доирасидаги илк Apple қурилмаси ўша йили тақдим қилинган қизил рангли iPod бўлган эди.
Ўтган йили Apple iPhone 7'нинг қизил рангли талқинини тақдим қилганда Red хайрия ташкилоти раҳбари Дебора Дуган купертинолик гигант ОИТС, ўпка сили ва қизамиққа қарши курашиш учун ташкил қилинган Халқаро Фонд (Global Fund)нинг энг йирик донори эканлигини маълум қилган эди. Маълум бўлишича, Apple ҳамкорлик давомида RED ташкилотига $130 миллиондан ортиқ хайрия қилган.
Ўз iPhone'ларини, одатда, сентябр ойида тақдим қиладиган Apple янги ранг баҳонасида қурилмалар савдосини ҳам кўтариб олишни кўзламоқда.
Кўпчилик ёқтирадиган қизил ранг эса савдоларни жонлантириш учун яхши туртки бўла олади. Маълум бўлишича, Apple ўтган йили бир неча янги қурилма тақдим қилган бўлсада, жорий йилнинг биринчи чораги бўйича iPhone'лар савдоси бир фоизга тушган.
Бундан ташқари Samsung ўзининг навбатдаги «байроқдор» Galaxy S9 смартфонини эълон қилиши ортидан Apple маҳсулотларига қизиқиш бир мунча пасайган. Шу сабабли Apple янги ранг баҳонасида ўз мижозларига кичик бўлсада, янгилик тақдим қилмоқчи.
Маълумотларга кўра, айни вақтда дунё аҳли қўлида фаол бўлган Apple қурилмалари сони 1,3 миллиардга тенг.
