Apple энг инновацион компаниялар рейтингида 1-дан 17-ўринга тушиб кетди! (+видео)

Яқинда Fast Company агентлиги дунёдаги энг инновацион элликта компаниянинг навбатдаги йиллик рейтингини эълон қилди. Бултурги рўйхатнинг бошида турган купертинолик корпорация бу йил 17-ўринга тушиб қолган.

ЎҚИНГ: Дунёнинг энг қиммат брендлари эълон қилинди: Apple кучли учликда, лекин етакчи бошқа!

Янги рейтингга кўра, 2019 йилнинг февраль ойи ҳолатига кўра жаҳондаги энг инновацион компания – Meituan Dianping технологик фирмаси экан. Хитойликларнинг ушбу ташкилоти хизмат кўрсатиш (отелларни ва кино билетларини брон қилиш, овқатларни етказиб бериш) соҳасида фаолият юритади. 2018 йилда ушбу платформа жами 33,8 миллиард АҚШ доллари миқдорида тарнзакцияларни амалга оширган ва 2800 та шаҳарда 350 миллиондан ошиқ мижозга хизмат кўрсатган.

Шунингдек, топ-бешталикка Сингапурнинг Grab компанияси, NBA, The Walt Disney Company ҳамда Stitch Fix электрон тижорат хизмати ҳам кирган. Square, Oatly, Twitch, Shopify ҳамда Alibaba Group кабилар ўтган йилги етакчи – Apple’ни қувиб ўтишган.

ЎҚИНГ: Энг инновацион мамлакатлар рейтинги билан танишинг

Қуйидаги видеолавҳада эса энг йирик 15 та бренд рейтинги таркиби 2000 йилдан буён қандай ўзгарганлиги яққол кўрсатиб берилган. Масалан, Nokia, HP ва Intel каби техногигантлар вақти келиб Apple’га йўл беришган. Энди эса, афтидан, йўл бериш навбати купертиноликларга келяпти-ёв...

Fast Company рейтингини шакллантириш учун мингдан ошиқ компанияларнинг вакиллари орасида сўровнома ўтказилиб, уларнинг наздида йилнинг энг сезиларли инновациялари нима экани, бунинг бизнесга, соҳа ривожига ва умуман маданиятга қанчалик таъсир кўрсатгани сўралади. Бу йилги рейтингда Apple фақат «Маиший электроника» бўлимидагина Google, Microsoft ва Dell’дан олдинга чиқиб, рўйхатда етакчи бўлди.

ЎҚИНГ: Тим Кукдан ҳам икки баравар кўп маош олувчи ходим Apple’ни ташлаб кетди