Apple iPhone 6’ни хитойлик компаниядан кўчирганликда айбланмоқда
Пекин интеллектуал мулк судида кўрилаётган даъво аризасида Apple’нинг iPhone 6 ҳамда iPhone 6 Plus мобиль алоқа воситаларининг дизайни аслида маҳаллий смартфон ишлаб чиқарувчиларининг ғояси эканлиги айтилмоқда.
Пекин интеллектуал мулк идорасининг маълум қилишича, айфоннинг мазкур моделлари кўриниш жиҳатдан Хитойнинг “Baili” брендига тегишли 100C phone смартфони билан бир хил. 100C phone смартфонларига олинган патент эса Apple қурилмалариникидан анча илгари олинган экан.
Агар мазкур даъвода маҳаллий ишлаб чиқарувчи ютиб чиқса, iPhone 6 қурилмаларининг Хитойдаги савдоси таъқиқланиши мумкин.
Сўнгги ойларда Apple Хитойда кўп тазйиқларга учрамоқда. Хусусан, апрель ойида компаниянинг iTunes Movies ва iBooks хизматларидан фойдаланиш Хитойда таъқиқланган эди.
Май ойида эса Apple “iPhone” номи билан чарм буюмлар ишлаб чиқарувчи хитойлик компанияни судга берган эди. Аммо маҳаллий ишлаб чиқарувчи бу номни 2007 йилда рўйхатдан ўтказгани, Apple эса бунга қадар “айфон” сўзининг мамлакатда машҳур бўлиб бўлганлигини исботлай олмагани учун судда мағлуб бўлган.
5.5 дюймли iPhone 6 ва iPhone 6 Plus Apple томонидан 2014 йилнинг сентябрь ойида намойиш қилинган бўлиб, iPhone мобиль алоқа воситаси моделининг 8-авлоди ҳисобланади.
