Apple жаҳондаги таниқли иловани йирик нархга харид қилди

Apple Буюк Британиянинг Shazam Entertainment компаниясини харид қилганини тасдиқлади. Мазкур компаниянинг смартфонларга мўлжалланган иловаси микрофон орқали аудио ёзиб олиб, унинг қайси мусиқий композиция эканини ҳамда бошқа маълумотларни аниқлайди ва номини айтади. Бу тўғрида Reuters хабар тарқатмоқда.

Apple Shazam учун қанча тўлаганини маълум қилмаган бўлса ҳам, таниқли TechCrunch техноблоги бу харид $400 млн долларга амалга оширилганини ёзмоқда. Америкалик компаниянинг фикрича, Shazam иловаси Apple Music экотизими учун айни керак лойиҳа. Бу илова ёрдамида Apple Music ўз рақиби Spotify (Apple Music 27 млн, рақиби 60 млн фойдаланувчига эга) устидан ғалаба қозонишига ёрдам беради. Маълум бўлишича, айни пайтда Shazam иловасидан жаҳон миқёсида 150 млн нафар одам фаол фойдаланади.

Shazam – мусиқани танийдиган жаҳондаги таниқли хизмат. Унинг ёрдамида хоҳлаган контентни: аудио-, видеоролик, қолаверса реклама эълонлари, газета ва журналлардаги босма реклама, кўча-кўйдаги баннер суратларини, қадоқ суратларини аниқлаштириш мумкин.

2000 йилда асос солинган Shazam фаолияти учун сармоядорла $143,5 млн доллар сарф қилишган.