Apple миллионлаб iPhone’ларни қаровсиз қолдиради

MacObserver нашри маълумотларига кўра, Apple’нинг эски — iPhone 5 ҳамда iPhone 5C смартфон моделлари iOS’нинг кейинги талқинларини қўллаб-қувватламаслиги мумкин. Афтидан,
iOS’нинг 10.3.2 рақамли янгиланиши 32 битли процессор ўрнатилган айфонларда ишламайди. Бу — миллионлаб iPhone 5 ва iPhone 5c эгалари янги тизимдан фойдалани олмайдилар, дегани.

Аввалроқ iOS’нинг синов талқини дастурчилар учун эълон қилинган эди. Бу талқин фақатгина 64 битли процессорларга мўлжалланган.

Агар iOS 10.3.2’нинг сўнгги талқини ҳам 32 битли процессорларда ишламайдиган бўлса, iPhone 5 ҳамда iPhone 5c эгалари iOS’нинг 10.3.1 тизимида қоладилар. Ҳисоб-китобларга кўра, бугун жаҳонда тахминан 43,7 миллион нафар одам мазкур айфон моделларидан фойдаланадилар. iPhone 5 гаджети 2012 йилда тақдим қилингач, жами 90 миллиондан зиёд сотилган.

Эслатиб ўтамиз, Apple A6 компаниянинг энг сўнгги 32 битли процессори бўлган. 2013 йилда iPhone 5S билан бирга 64 битли Apple A7 процессори тақдим қилинган. Шундан бошлаб Apple айфонларда 32 битли процессор ва бунга ихтисослашган иловалардан воз кечган.