Apple нега ўз мутахассисларини CES 2019’га «жосус тарзида» жўнатди?

Хабарингиз бор – шу ойнинг бошида Лас-Вегас шаҳрида Consumer Electronics Show 2019 кўргазмаси бўлиб ўтди. Купертинолик корпорация унда қатнашмади, лекин тадбир иштирокчиларининг жиғига тегиш учун ажойиб усул қўллади.

ЎҚИНГ: Apple рекламани «илиб қўйди»: у CES 2019 қатнашчиларини масхара қилмоқда!

Хорижий нашрларнинг ёзишича, Apple ушбу кўргазмада расман иштирок қилмаган бўлса-да, «жосус жўнатган». Яъни, купертинолик техногигант ходимлари CES 2019 тадбирига аноним тарзда, яъни қаерда ишлаётганини билдирмасдан, шунчаки қизиқувчи шахслар кўринишида киришган.

Хабарларга кўра, Apple мутахассислари кўргазмадаги стендларни аниқ мақсад билан кезишган. Яъни, улар тўлдирилган воқелиқ (тўлдирилган реаллик; augmented reality – AR) технологиялари бўйича ишлаётган компанияларнинг чиқишларини кузатишган.

Табиийки, бунинг сабаби бор – купертинолик техногигант ўзининг AR-кўзойнаги – Apple Glass устида ишламоқда. Компания ушбу гарнитурасини 2020 йилдаёқ тақдим этишни режалаштирган ва ҳозирда унинг учун тўлқин узатгич етказиб берувчи ҳамкор изламоқда.

Appleinsider ресурсининг ёзишича, кўргазмада Apple ходимлари AR-кўзойнаклар учун тўлқин узатгичлар (волновод; waveguide) ишлаб чиқарувчи DigiLens, Lumus, Vuzix, WaveOptics ва бошқа компаниялар ечимларини ўрганиб чиқишган.

ЎҚИНГ: Apple ноёб кўзойнак ва «келажак автоси» устида ишламоқда