Apple’нинг фазо кемаси парвозга деярли тайёр (Видео)

АҚШлик гигант мана бир неча ойлардан бери ўзининг фазо кемасини қуриш билан овора. Фазо кемаси деганда компания барпо қилаётган янги кампусни назарда тутяпмиз. Ахир, ушбу кампус ўз дизайни ва кўриниши билан фантастика киноларидаги фазо кемасини ёдга солади.

Икки йилдан камроқ бўлган вақт мобайнида Apple пудратчилари ҳақиқатдан ҳам бағоятда катта ишни амалга оширдилар. Буни дронлар ёрдамида олинган видеодан ҳам кўриш мумкин.

Янги кампуснинг умумий майдони 260 000 квадрат метрни ташкил қилади, тўрт қаватли бино остида бир неча поғонали автомобиль турар-жойлари кўзда тутилган. Янги қуриладиган “фазо кемаси”да бир вақтнинг ўзида 14 000 дан ортиқ ходим меҳнат қилиши мумкин. Бундан ташқари, кампус атрофида ҳам бир нечта қўшимча бинолар қурилмоқда. Бундай биноларга, жумладан, экологик жиҳатдан тоза электростанцияни мисол қилиш мумкин.

Apple мазкур кампус қурилишига 5 млрд доллар атрофида маблағ сарфлашни режалаштирган. Лойиҳа шу йилнинг охирида якунига етказилиб, компания янги кампусга кўчиб ўтиши мумкин бўлади.

Рейхстаг биносининг реконструкцияси, IBM штаб-квартираси, Сингапур олий суди биноси ва бир қатор бошқа ишлари билан танилган британиялик архитектор Норман Фортер мазкур лойиҳага муаллифлик қилмоқда.