Apple’нинг илк компьютери оламшумул нархда сотилмоқда

Apple’нинг илк компьютери оламшумул нархда сотилмоқда

Германияда ўтадиган ким ошди савдосида Apple корпорацияси томонидан ишлаб чиқарилган илк компьютерлардан бири 309 минг АҚШ доллари баҳосида сотувга қўйилмоқда. Бу тўғрида The Sun нашри маълум қилади.

Ушбу Apple-1 компьютери айни пайтда ҳам фаолият кўрсатадиган ҳолатда бўлиб, бутун жаҳонда бундай электрон ҳисоблаш машинаси саноқли ҳисобда сақланиб қолинган. Компьютер “Олма” компаниясининг асосчиларидан бири Стив Возняк томонидан 1976 йилда Стив Жобсга тегишли гаражда қўлда йиғилган. Умумий ҳисобда компания 150 дона шундай моделдаги компьютерни ишлаб чиқарган ва улар ўша вақтда $666.66 доллари баҳосида сотилган. Компьютерга 1 МГц частота тезлигида ишлайдиган MOS 6502 процессори ўрнатилган.

Яхши сақланган Apple-1 компьютери АҚШнинг Калифорния штатида истиқомат қилувчи инженер томонидан сотувга қўйилган. Харидорга қурилма билан бирга унинг асл нусхадаги ҳужжатлари ва Стив Возняк ҳамда Стив Жобсларнинг суҳбатлари ёзилган аудио файллар ҳам топширилади. Apple’нинг илк компьютери сотиладиган аукцион 20 май куни Германиянинг Кельне шаҳрида бўлиб ўтади.

Бунгача мазкур моделдаги компьютерни Италиялик бизнесмен 2010 йилда $210 минг АҚШ долларига харид қилган.

Сайт янгиликларидан доимий хабардор бўлиш учун Телеграм каналимизга қўшилинг!