Apple’нинг кейинги икки йилдаги энг харидоргир гаджетлари аниқланди – бу iPhone ҳам, iPad ҳам эмас
Ceros платформаси мутахассислари махсус тадқиқот ўтказиб, купертинолик техногигантнинг кейинги икки йилда энг кўп сотилган маҳсулотини аниқлашди. Бунинг учун АҚШ ва Канада бозоридаги маиший электроника дўконларининг энг йирик тармоғи – Best Buy тақдим этган маълумотлардан фойдаланилди.
ЎҚИНГ: Apple Store’га салкам бир килограмм наркотик модда етказиб беришди!
Маълум бўлишича, 2016 йилнинг бошида энг кўп сотилган Apple маҳсулоти – бир метрлик Lightning-to-USB 2.0 кабели бўлган. Кўпчилик «тишланган олмали» гаджетлар ишқибозлари айни шу аксессуарни тез-тез бузиб ёки йўқотиб қўйишлари бунга сабабчи экан.
Харидоргирлиги бўйича иккинчи ўринни Earpods симли қулоқчини забт этган бўлса, учинчи поғонада Apple TV медиаплеери турибди. Йил давомида дастлабки икки девайс ўзаро ўрин алмашган, учинчи ўрин учун эса Apple TV билан бирга 8 ГБ тезкор хотирали MacBook Air ноутбуки курашишган.
ЎҚИНГ: Apple’дан арзон ноутбуклар? Ишониш қийин
2017 йилнинг иккинчи чорагида Lightning-to-USB 2.0 кабели оммабоплик шоҳсупасидан тушган ва бунга iPhone 7 чиқиши сабаб бўлган. Зеро, Apple ушбу смартфонда 3,5 миллиметрлик тирқишдан воз кечган ва натижада шундай портга уланувчи адаптер энг харидоргир маҳсулотга айланган. Lightning-to-USB 2.0 кабели эса иккита чоракдан сўнг учинчи ўринга тушиб қолган, 2017 йилнинг тўртинчи чорагига келиб эса иккинчи ўринга AirPods симсиз қулоқчини чиқиб олган.
Ушбу тенденция давом этиб, 3,5 миллиметрлик ҳамда Lightning портли адаптер аста-секинлик билан оммабоплигини йўқотган ва айни дамда AirPods купертиноликнинг энг харидоргир маҳсулоти ҳисобланади.
