Apple'нинг кузда кутилаётган барча девайслари билан танишинг
Жорий йилнинг кузида америкалик ахборот технологиялари ишлаб чиқарувчиси Apple бизни учта iPhone моделларидан ташқари, бошқа аппарат маҳсулотларининг янгиланган талқинлари билан ҳам хурсанд қилади. TF International Securities компанияси таҳлилчиси Минг-Чи Куога кўра, купертинолик гигант ҳаттоки бир неча йиллардан буён унутиб қўйган гаджетларини ҳам янгилашни режа қилган.
Хўш, Apple сентябрдаги тақдимотда нималарни тақдим қилмоқчи? Қуйида бу рўйхат билан яқиндан танишамиз.
Дисплей диагонали 5,8, 6,1 ҳамда 6,5 дюймли бўлган янги iPhone девайслари;
Face ID қиёфани сканерлаш технологияси татбиқ қилинган ва экрани 11 дюймли бўлган iPad Pro планшети;
MacBook, MacBook Pro (тақдим қилинди), iMac ҳамда Mac Mini + янги ва қиммат бўлмаган ноутбук;
Дисплей диагонали 1,57 ҳамда 1,78 дюймгача бўлган Apple Watch "ақлли соати";
Симсиз қувватлаш тизими жорий қилинган ҳамда AirPower қувватлаш панелига эга бўлган AirPods овозли ёрдамчи гаджети;
Куонинг қайд этишича, Apple бу йил Face ID функцияси ўрнатилган, шунингдек экрани катталаштирилган iPad Pro девайсини тақдим қилади. Энди планшетларда ҳам Home тугмасидан воз кечилиши натижасида планшет экранининг ромлари қисқариб, планшет ўлчамини сақлаган ҳолда, дисплейни кенгайтириш имкони мавжуд бўлади. Аниқроғи, дисплей диагонали 11 дюймга етади.
Янги Mac Mini нимаси билан ўзига хос?
Жаноб Куонинг таъкидлашича, янгиланган Mac Mini ҳам кузда тақдим қилинади. Таҳлилчининг ишонч билан айтишича, бу йил кузда Apple ўз ваъдасининг устидан чиқади ҳамда янги авлод десктоп компьютерини ишлаб чиқаради. Унинг бош ўзига хослиги нархининг анча пастлигида. Ҳозирча бошқа жиҳатлар ҳақида маълумот йўқ.
Янги Apple Watch
Apple Watch, кутилганидек, ҳозирги авлодга қараганда каттароқ дисплей билан таъминланади. Аниқроғи янги "ақлли соат"нинг экрани 15% га катталашади. Фойдали майдонннинг ҳажми ошиши эвазига ундан унумли фойдаланиш имкони ҳам ошади. Ишлаб чиқарувчи пульсометр сенсорини ҳам янги функциялар билан бойитади.
