Apple’нинг навбатдаги тақдимоти 21 март куни бўлиб ўтади  

Apple’нинг 21 март куни iPhone, iPad ҳамда Apple Watch қурилмаларининг янги талқинларига бағишланган намойиши Калифорния штатининг Купертино шаҳрида ўтказилиши компания томонидан расман тасдиғини топди. Аниқроғи компания ўзининг веб-саҳифасида 21 март куни бўлиб ўтадиган навбатдаги онлайн кузатиш таклфини билдирган. Шунингдек, тадбирга оммавий ахборот воситалари вакиллари расман таклиф қилинган.

Компания тақдим этиши кўзда тутаётган қурилмалар орасида iPhone SE – 4 дюймли смартфон, iPad Pro планшетининг янги талқини, “ақлли соат”нинг янги авлоди бўлиши мумкин. Унинг “iPhone SE”, “iPhone 5SE ” ёки “iPhone 6C” деб номланиши кутилмоқда. Янги смартфон рақамсиз номга эга бўлиши ҳам мумкин.

Шунингдек, мазкур намойишда 9.7 дюймли iPad Pro ёки  iPad Air 3 планшетлари ҳам тақдим этилиши мумкин.

IPHONE SE:

Унинг 2013 йилда намойиш қилинган iPhone 5S’га ўхшаб кетиши тахмин қилинаётган бўлса ҳам, янги талқин бир қатор замонавий инновацияларга эга бўлади. Қурилма корпусининг бир оз қайрилма бўлиши кутилмоқда.

iPhone 5S

4 дюймли iPhone SE смартфонининг имкониятлари iPhone 6S билан бир хил бўлади. Гарчи унинг экран диагонали кичик бўлса ҳам, нарх-навоси масаласида турлича фикрлар бор. 9to5Mac технологиялар блогида ёзилишича, бу қурилма  iPhone 5s’га ўхшайди ва унинг нархи ҳам ўзининг «аждоди»ники каби, 450 АҚШ долларидан сотувга чиқарилиши мумкин.

Яна бошқа бир манбаада эса унинг нархи Apple iPhone 6S’никига яқин бўлиши мумкинлиги қайд қилинган. Эслатиб ўтамиз, 2016 йилнинг 9 март ҳолатида “Малика” савдо мажмуасида iPhone 6S гаджети  (64Гб) 4 257 000 сўмдан сотилмоқда.

iPhone SE’нинг тахмин қилинаётган ўзига хос жиҳатлари:

4 дюймли ультра юқори ҳажмли пиксель сиғимига эга Retina display;

Apple A9 процессори (2015);

1 ГБ тезкор хотира;

8 МП орқа камера;

1.2 МП олд камера;

Touch ID бармоқ излари сканери;

iOS 10 операцион тизими.

Смартфонда NFC – яқин масофада алоқа ўрнатиш технологияси, Apple Pay – яқин масофада тўловни онлайн амалга ошириш тизими жорий қилинади.

Маълумотларга қараганда, унда iPhone 6S’да татбиқ қилинган 3D Touch технологияси бўлмайди.

IPAD PRO (9.7 дюймли):

Гарчи Apple 2015 йилда 12.9 дюймли iPad Pro планшетини тақдим қилган бўлса ҳам, жорий йилда фойдаланувчилар диққатига унинг 9.7 дюймли янгиланган талқинини ҳавола қилмоқчи.

Кўпчилик экспертлар эса компаниянинг узоқ вақтдан буён кутилаётган iPad Air 3 планшетини намойиш қилишини айтишмоқда. У 2014 да эълон қилинган iPad Air 2 қурилмасининг “авлоди”.

iPad Pro

2016 йилнинг iPad гаджети 9.7 дюймли, пиксель сиғими 2334 x 3112, 4K технологияга асосланган экранга эга бўлиб, 3D Touch технологияси билан таъминланган бўлади.

iPad Pro 2016’да  уни “ақлли клавиатура” билан улайдиган Smart Connector интерфейси, 4 дона овоз узаткич, камера фоточақноғи бўлади.

Ҳозирча нарх-наво борасида бирор фикр айтиш қийин. Amazon интернет дўконида компаниянинг сўнгги планшети – Apple iPad Pro 720.99 АҚШ долларидан сотилмоқда. “Малика” савдо мажмуасида эса iPad Air 2 (Wi-Fi, 4G, 64 Гб.) қурилмаси 4.150.000 сўмга баҳоланган.

APPLE WATCH 2:

2014 йилнинг сентябрь ойида компания томонидан Apple Watch тақдим этилгач, “ақлли соат” дизайни кўпчилик эксперт ва фойдаланувчилар томонидан яхши кутиб олинган эди.

Apple Watch 2’нинг япалоқ шаклга эга бўлиши ҳам кутилмоқда. Ақлли соатларнинг навбатдаги авлодида ARM Cortex A32 процессоридан фойдаланилиши мумкин. Маълум қилинишича, янги A32 процессори қурилмани олдинги процессорлардан 25 фоиз тезроқ ишлашини, сифатли намойишини таъминлайди.

Apple компанияси томонидан янги соатга мўлжалланган магнитли тасма учун патент олгани хабар қилинмоқда. Бу қўшимча тасмага соат экрани ўзини олиб жойлаштириш, тунги вақтда уни стол устига тикка ҳолатда ўрнатиш қулайликларини яратади.

Apple Watch 2 ёрдамида видео қўнғироқларни амалга ошириш учун Facetime камераси ҳам бўлиши мумкин. Унда фойдаланувчи саломатлигига хизмат қилувчи бир қатор сенсор ва фитнес иловалар ҳам бўлади.

9to5mac блогининг ёзишича, электрон соат корпусида титан, вольфрам, палладий ва платина металларидан фойдаланилади. Бу эса гаджет нарх-навосига таъсир кўрсатади. Ҳозирча экспертлар “ақлли соат”нинг $1,000 АҚШ доллари атрофида сотилиши тахмин қилинмоқда.