Apple ўзининг iPhone, iPad ва Маc қурилмалари учун янги турдаги янгиланишни чиқарди
Ўтган йилнинг WWDC конференциясида Apple ўзининг iPhone, iPad ва Маc қурилмалари учун Rapid Security Response (Тезкор хавфсизлик жавоби) янгиланишини тақдим қилган эди. Янги турдаги ушбу тизим янгиланиши фойдаланувчилар учун жиддий хавф туғдирадиган хавфсизлик заифликларини тезда тузатишга қаратилган бўлиб, у доимги янгиланишларга қараганда тезроқ ўрнатилади ва ҳатто, бу турдаги айрим янгиланишларни смартфонни ўчириб ёқмасдан ҳам ўрнатиш мумкин бўлади. Кеча, Ўзбекистон вақти билан тунги 10:00 лар атрофида Apple ўзининг ана шундай тезкор хавфсизлик жавоби янгиланишининг илк версиясини чиқарди (The Verge орқали).
iOS версияси 16.4.1 бўлган iPhone эгалари худди шу версиянинг ёнига "(а)" белгиси қўшилган, яъни iOS 16.4.1 (а) 85 MB ҳажмдаги "тезкор хавфсизлик жавоби" янгиланишини қабул қилишган. Энг сўнгги iPadOS ва macOS версиясидаги iPad ҳамда Маc фойдаланувчилари учун ҳам худди шундай: iPadOS 16.4.1 (а) ва macOS 13.3.1 (а) янгиланиши тарқатилган. Таъкидлаш жоизки, эски версиядаги операцион тизим фойдаланувчилари ушбу тезкор хавфсизлик янгиланишини олишмайди. Улар учун тузатишлар кейинги янгиланишлар билан бирга келади.
— Том Варрен (@томваррен) Май 1, 2023
Афсуски, Apple'нинг илк "тезкор хавфсизлик жавоби"ни қабул қилиш унинг харидорлари учун кўнгилдагидек кечмади – кўпчилик фойдаланувчилар янгиланиш чиқарилиши билан уни дарҳол ўрната олишмаган ёхуд уларда "Хавфсизлик жавобини текшириб бўлмади" номли хабар пайдо бўлиб қолаверган. Унда "iOS Security Response 16.4.1 (а) текшируви амалга ошмади, чунки сиз энди интернетга уланмагансиз." дейилган. Бироқ орадан 2-3 соат ўтгач ҳаммаси жойига тушган, янгиланишни 30 сония ичида ўрнатиш мумкин бўлган.
Rapid Security Responses - бу iPhone, iPad ва Маc учун дастурий таъминот янгиланишининг янги тури бўлиб, улар дастурий таъминот янгиланишлари ўртасида муҳим хавфсизлик яхшиланишлари билан таъминлайди - масалан, Safari веб-браузери учун тузатишлар, Webkit структура тўплами ёки бошқа муҳим тизим кутубхоналари. Шунингдек улар аллақачон ишга тушган баъзи хавфсизлик муаммоларини тезкор енгиллаштириш учун ишлатилиши ҳам мумкин – Apple.
Ҳозирча Apple ўзининг iOS учун хавфсизлик янгиланишлари саҳифасини нима учун тезкор хавфсизлик янгиланишини чиқарганини ёхуд айнан қайси муаммолар тузатилаётганини тушунтириш учун янгилаганича йўқ.
