Apple Park’да Apple раҳбари билан тушлик аукционга қўйилди
Apple корпорациясининг бош директори Тим Кук билан “Олма”нинг “Кремний водийси”даги янги штаб-квартирасида тушлик қилиш интернет-аукционга қўйилди. Ундан тушган маблағ Роберт Ф. Кеннеди номидаги ҳуқуқни муҳофаза қилиш маркази ҳисобига ўтказиб берилади. Хайр-саховат акциясида иштирок этиш истагида бўлганлар CharityBuzz сайтига кириб, тушлик учун ўзларининг нархларини таклиф қилишлари мумкин.
Тим Кук билан учрашув қурилишига 5 миллиард доллар маблағ сарфланган Калифорниянинг Купертино шаҳрида жойлашган Apple Park ҳудудида бўлиб ўтади. Тушлик учун энг кўп сарфлаган саховатпеша, шунингдек яна бир қўшимча чиптага эга бўлиб, тушликка ҳамроҳи билан келиши мумкин бўлади. Қолаверса, аукцион шартларига кўра, транспорт, яшаш боқа харажатлари учун иштирокчининг ўзи тўлаши керак бўлади.
Бунгача ҳам Тим Кук 5 маротаба хайр-саховат мақсадида ўтказилган бундай тушликларда иштирок этган. Мисол учун, 2016 йилда Apple раҳбари билан бир финжон қаҳва ичиш учун кўнгилли бир киши $515 000 доллар тўлаган. 2015 йилда Тим Кук билан тушлик учун иштирокчи $200 000 доллар тўлаган бўлса, 2014 йилда бу $330 000 долларга тушган. Тим 2013 йилда жаҳон тарихидаги энг қиммат тушлик “муаллиф”ларидан. Ўшанда у билан овқатланиш учун $610 000 доллар тўланган. Бу маблағлар “Адолат ва инсон ҳуқуқлари маркази”га ўтказиб берилган.
Таниқли шахслар билан тушликлардан маблағ ишлаш Америкада саховатпешаликни илгари сурган акцияларнинг замонавий ва нуфузли шакли ҳисобланади. Бу борада миллиардер Уоррен Баффеттнинг олдига тушадигани йўқ. 2012 йилда пуллик тамадди ва қаҳвахўрликлар учун жаноб Баффет нодавлат ташкилотларга $3,46 млн доллар ишлаб берган.
Apple раҳбари ҳам бу борада рекорд ўрнатиш ҳаракатида. Унинг сўзларига кўра, пулини аямаган инсон билан тушлик столи устида камида 1 соат суҳбат қилишни режа қилган.
