Apple қайта тикланган iPhone’ларни сотишни бошлади

АҚШнинг Apple компанияси ўзининг онлайн дўконида қайта тикланган iPhone’ларнинг навбатдаги сотувини бошлади. “Олма” 2007 йилдан буён қайта тикланган қурилмаларни яна сотувга чиқариш тизимини йўлга қўйган. Айни дамда фирманинг онлайн дўконида тикланган iPhone 6, iPhone 6s Plus ва бошқа моделларни харид қилиш мумкин.

The Verge сайтининг маълум қилишича, қайта тикланган қурилмаларнинг нархи янги қурилмаларнинг нархига қараганда 15 фоизгача арзонроқ. Шундай бўлса-да фирма мазкур гаджетларга ҳам бир йиллик расмий кафолат хизматини тақдим этади. Қайта тикланган iPhone’ларга янги батарея ва корпус ўрнатилади.

Эслатиб ўтамиз, олдинроқ Apple онлайн-дўкони орқали тикланган Mac компьютерлари, Macbook ноутбуклари ва iPad планшетларини ҳам сотувга чиқариб келган.