Apple раҳбари: Автосаноат техник инқилоб арафасида
Apple раҳбари Тим Кук сарлавҳадаги фикрни билдирганлигини ўзбек тилида автомобиль янгиликларини нашр қилувчи carzone.uz сайти тарқатди. Apple ўз автомобили устида ишлаётганлиги ҳақидаги хабарни изоҳлади, аммо ишлаб чиқариш эҳтимоли ҳақда оғиз очмади.
“Ушбу соҳа катта ўзгаришлар палласида турганини тахмин қиламан, бу оддий тадрижий ўзгариш бўлмайди”, дейди Кук. У Apple ўз автомобилини чиқариши ҳақидаги саволга жавоб бермади, аммо технологик ўзгаришлар авжида бегона компаниялар автобизнесга аралаша олиши ўта мушкуллигини таъкидлаб ўтди. Кук фикрига кўра, дастурий таъминот тобора автомобилнинг муҳим таркибий қисмига айланяпти, келажак автомобилини юритишда унинг роли катта бўлади. Шунингдек, электромобилларнинг анъанавий ички ёнув двигателли машиналарга рақобати ҳақида ҳам тўхталди.
Financial Times нашри Apple автоэкспертларни йиғиб, автомобиль ишлаб чиқариш учун қандай ишлар қилиш зарурлиги масаласини қўйганлигини ҳам эслатиб ўтади.
Apple раҳбари авто ишлаб чиқарувчиларнинг ўз мултимедиа тизимлари, ҳозирча, автоҳаваскорлар эътиборини қозонмаганига, бу эса технологик компаниялар авто бозорига кириб олиши учун имконият беришига тўхталиб ўтган.
Аввалги нашрлар Apple ўз автомобилини 2019 йилда ишлаб чиқаришни режалаштираётгани, лойиҳа “Титан” шартли номини олганини ёзганди.
