Apple рекламани «илиб қўйди»: у CES 2019 қатнашчиларини масхара қилмоқда!
Шу кунларда Лас-Вегас шаҳрида йилнинг муҳим тадбирларидан бири – Consumer Electronics Show кўргазмаси бошланмоқда. Apple унда иштирок этмайди; одатда мазкур корпорация бу каби тадбирларга қатнашмасдан, ўзи алоҳида тақдимот тадбирлари уюштиради.
ЎҚИНГ: CES 2019’да Samsung нималарни кўрсатмоқчи? (СПОЙЛЕР: бу рўйхатда бирортаям смартфон йўқ!)
Ўзи кўргазмада қатнашмаётгани камлик қилгандек, Apple мазкур тадбир иштирокчиларини калака қилмоқда. Купертинолик гигант CES 2019 бўлиб ўтадиган Лас-Вегас шаҳридаги SpringHills меҳмонхонаси деворини реклама учун ижарага олган.
Apple бу деворга: «What happens on your iPhone, stays on your iPhone», яъни «Айфонингизда юз берган ҳамма нарса айфонингизнинг ўзидагина қолади» ёзувли улкан реклама баннерини илиб қўйган. Бу эса Ғарбда машҳур бўлган «Вегасда юз берган ҳамма нарса Вегаснинг ўзидагина қолади» нақлининг пародиясидир.
Баннерда мазкур ёзув остида компания сайтидаги хавфсизлик маълумотлари берилган саҳифа манзили – apple.com/privacy ҳам туширилган. Айтиш керакки, Las Vegas Convention Center’да бўлиб ўтадиган кўргазманинг барча қатнашчилари ва ташриф буюрувчилари Apple’нинг мана шу рекламасини албатта кўришади. Купертиноликлар бу билан ўзининг iPhone’лари маълумотлар хавфсизлиги борасида Android-смартфонлардан устун эканлигини яна бир бор таъкидлаб, CES 2019’га келганларга буни эслатиб қўйишмоқда.
