Apple тенгдир Apple'га: iPhone 15 смартфонларининг USB-C порти оддий USB-C кабеллари билан "келиша олмайди"

Apple тенгдир Apple'га: iPhone 15 смартфонларининг USB-C порти оддий USB-C кабеллари билан

Европа Иттифоқи қонунчилигига мувофиқ равишда Apple компаниясининг янги авлод iPhone смартфонлари Lightning эмас, балки USB-C порти билан чиқарилиши кутилмоқда. Бироқ, Apple яна Apple'лигини қиладиган кўринади: iPhone 15 смартфонлари USB-C портига эга бўлиши, улар исталган USB-C кабел билан ишлайверишини англатмайди.

Хитойнинг Weibo ижтимоий тармоғида янги миш-миш пайдо бўлди. Маълум бўлишича, бўлажак iPhone 15‌ смартфонларинининг USB-C порти Apple улар учун "эксклюзив" чиқарадиган USB-C кабелларида ишлайди. Тушунарлироқ қилиб айтганда, компания ўзининг смартфонлари учун махсус USB-C вариантини чиқаради. Бунда Apple'нинг USB-C кабели Lightning'да бўлгани каби интеграциялашган схема (IC) чиплари билан жиҳозланади. Бундай чиплар эса MFi томонидан сертификатланган бўлади ва кабел уланишида иштирок этадиган қисмларнинг ҳақиқийлигини тасдиқлайди. Айтиш керакки, MFi томонидан сертификатланмаган учинчи томон зарядловчи кабеллари бундай чипга эга эмас.

Гарчи миш-мишлар тўғри бўлиб чиқса ҳам, бу iPhone 15 смартфонлари портлари бегона USB-C кабелларини 100% қўллаб-қувватламайди дегани эмас. Mfi билан сертификатланган кабеллардан бошқа учинчи томон USB-C кабеллари билан алоқада катта эҳтимол билан iPhone'ларнинг тезкор қувватланиши ва маълумотлар узатилиши чекланиши мумкин холос.

Таъкидлаш жоизки, Apple'нинг бу юриши фойдаланувчилар iPhone учун USB-C кабелларни фақат унинг ўзидан сотиб олишини имкон яратиш билан биргаликда компанияга сохта ва потенсиал хавфли аксессуарларга қарши курашиш имконини беради.

Шуни ҳам айтиш керакки, Apple'нинг айрим iPad, Apple TV пулти ва Маc'лари USB-C порти билан жиҳозланган, лекин улар аутентификация учун IC чипига эга эмас ёхуд уларда исталган Type-C кабелларидан фойдаланиш мумкин.

Аввалроқ, таниқли таҳлилчи, Минг Чи Куо, iPhone 15 ва iPhone 15 Plus смартфонларининг USB-C порти худди Lightning каби USB 2.0 версиясида қолиши, фақатгина Pro моделлар бундан юқори версияда тезроқ хусусиятларга эга бўлишини айтган эди. Бунда базовий iPhone 15 смартфонларининг USB-C порти билан Lightning порти ўртасидаги фарқ фақат уларнинг жисмоний шакли ўзгаришида бўлади холос.

ЎҚИНГ: 240 Вт тезликда қувватланадиган илк смартфон расман тақдим қилинди