Apple техника чиқитларини қайта ишлаб, 240 тонна металлни тежаб қолди
Apple фақат иккиламчи хом ашё, яъни истеъмолдан чиққан қурилмаларнинг материалларидан гаджетлар ишлаб чиқаришга ихтисослашган ёпиқ мажмуа яратиш бўйича лойиҳани амалга оширмоқда. Компания 2016 йилда экологик жавобгарликка оид ҳисоботида маълум қилишича, бу қарор ахлат уюмларига отилаётган металларни қайта ишлаб, компаниянинг янги хом ашё ресурсларидан фойдаланишини камайтириш эвазига табиий бойликларни асрашга хизмат қилади.
Истеъмолдан чиққан қурилмалар платасидан мис, қалай ва қимматбаҳо металлар, эски литий-ионли аккумуляторларидан кобалт рангли металлини олиш мумкин.
Компаниянинг маълум қилишича, 2015 йилнинг ўзида истеъмолга яроқсиз чиқиндиларнинг қайта ишланиши натижасида Apple етказиб берувчиларидан сотиб оладиган йиллик металл миқдори 240 тоннага камайган.
Агар бу лойиҳа тўлиқ ишга тушса, Apple гаджетларни тўлиқ истеъмолдан чиққан материаллардан тайёрлайдиган жаҳондаги илк IT-компанияга айланади.
Айни кунда компания ўз брендига мансуб фойдаланилмаётган қурилмаларни қабул қилишни бошлаган. Бунинг учун махсус Apple Renew дастури эълон қилинган. Мисол учун, алюминий металлидан тайёрланган iPhone 6 корпусидан Mac mini учун корпус тайёрланади. Apple бунинг учун фақатгина ўзи ишлаб чиқарган қурилмаларнинг алюминий металлидан фойдаланади. Боиси, унинг аввалги қурилмаларидаги металл сифати шахсан компания назоратида бўлган ва улардан кейинчалик ҳам iPhone, iPad ва бошқа қурилмалар ишлаб чиқариш мумкин.
Apple яратган махсус Liam номли робот iPhone ва бош мобил алоқа воситаларини бўлакларга бўлиб, улардаги бутловчи қисмларни ажратиб олади. Айни пайтда фаолиятини бошлаган 2 та йирик конвейер йилига 2,4 млн дона қурилмани қисмларга ажратади.
