АҚШга бормоқчимисиз? Барча аккаунтларингизни «ортиқча» гаплардан тозаланг!
Америка Қўшма Штатлари Давлат департаменти дунёнинг турли мамлакатлари фуқаролари учун виза бериш қоидаларига ўзгартириш киритди. Энди АҚШ ҳудудига кириш учун ариза берганда кишилар ижтимоий тармоқлардаги аккаунтлари ҳақида кейинги беш йилга тегишли маълумотларни ҳам тақдим этишлари керак бўлади.
ЎҚИНГ: Аккаунтингизни бузиб киришдан сақлаш усуллари
Айтиш керакки, аввал ҳам шу талаб бўлган, аммо у бутунлай ёки қисман террорчилар томонидан назорат қилинаётган ҳудудларга борган шахслар учунгина қўлланган эди. Энди эса ушбу назорат тури бошқа АҚШга киришни хоҳловчилар учун ҳам татбиқ этиладиган бўлди.
АҚШ Давлат департаментининг ушбу янги қоидани киритишдан мақсади – мамлакатга кираётган шахсларнинг у ёки бу йўл орқали террорчилар билан алоқадор бўлган шахсларни аниқлаш ва уларнинг киритилишига йўл қўймасликдир.
ЎҚИНГ: Террористлар қайси мессенжерлардан кўп фойдаланиши айтилди
Виза олишнинг янги қоидаларига кўра, аризачи ўз электрон поста манзилини, телефон рақамини, ижтимоий тармоқлардаги аккаунтлари манзилларини тақдим этиши лозим. Фақат айрим дипломатлар ва мансабдор шахсларгина аккаунтлар текширувига жалб этилмаслиги мумкин.
Шунингдек, консулликда сиздан мессенжерлардаги ва тармоқлардаги шахсий ёзишмаларингизни, махфийлик созламалари орқали оммавий кўринмайдиган қилиб қўйилган бошқа маълумотларингизни, масалан – шахсий фотосуратларингизни ҳам кўрсатишингизни сўрашлари мумкин.
Агарда сўралган маълумотлар тақдим этилмаса, ёки улар визага талабгор шахснинг террорчиликка алоқадорлиги ҳақида шубҳа уйғотса, бундай кишиларга АҚШ визаси берилмайди. Шундай экан, агарда ушбу океан орти мамлакатига бориш учун виза олмоқчи бўлсангиз, қачонлардир Facebook’да АҚШ ёки террорчилик ҳақида шунчаки кимгадир ҳазиллашиб ёзганингиз ҳам сиз учун тўсиқ бўлиши мумкинлигини ёдда тутинг.
ЎҚИНГ: Facebook тасмамиздан кераксиз пост ва лайкларни ўчирамиз
