Artel General Mobile (Android One) «Малика»да 812 минг сўмдан сотилмоқда

Эсингизда бўлса, 2015 йилнинг 5 октябрь куни Тошкент шаҳрида Американинг Google корпорациясининг янги Android One смартфонининг тақдимоти ўтказилган эди. Смартфон юртимизда General Mobile компанияси ҳамда  маҳаллий Artel савдо маркаси ҳамкорлигида август ойидан бошлаб ишлаб чиқарила бошланган эди.

General Mobile компанияси президенти Себахаттин Яман смартфонни тақдим қилар экан, янги гаджет Google’нинг муваффақиятли лойиҳаларидан бири эканини айтган. Қуйида шу смартфон тўғрисида батафсил маълумот берамиз.

Android One мобиль алоқа воситасининг икки аҳамиятли жиҳати бор: биринчидан, смартфон Google’нинг оммабоп ишланма ва қурилмалари билан кучайтирилган. Иккинчидан, гаджет Android операцион тизимини 2 йил мобайнида автоматик режимда янгилаб боради.

Android One алоқанинг GSM, WCDMA, 4G тармоқларида ишлашга мўлжалланган. Шунингдек, смартфон GPRS, EDGE, Wi-Fi 802.11 B/G/N, Bluetooth 4.0 симсиз алоқа тизимларида ишлайди.

Мазкур смартфоннинг дисплейи 5 дюймли бўлиб, экраннинг пикселлар сиғими 1280 × 720 белгига тенг. Дисплей Gorilla Glass 4 русумидаги ҳимоя шиша қатламига эга. Экранда мультитач технологияси татбиқ қилинган.

Android 5.1.1 операцион тизими (айни пайтда Android 6.0 Marshmallow’га янгиланган)га эга. “Ақлли телефон” 1 дона micro SIM’ни (Dual талқини ҳам бор) қўллаб-қувватлайди.

Гуглофон 1,2 Ггц частотада ишлайдиган  64 бит, 4 ядроли Qualcomm Snapdragon 410 процессор, график-тасвирни қайта ишлашга масъул Adreno 306 қўшимча видеографик тизими, 2 гб тезкор хотира ҳамда 16 гб доимий хотира билан таъминланган.

Гаджетнинг бош камераси 13 мп, олд камераси 5 мп. Android One’нинг қувватига 2500 мА соат электр токи сиғимига эга бўлган аккумулятор масъул.

2015 йилнинг май ойидан бошлаб сотувга чиққан қурилманинг халқаро бозордаги нархи ўртача $260 долларни ташкил қилади.

2016 йилнинг 27 апрель ҳолатида «Малика» савдо марказида Artel General Mobile “ақлли телефони” 812,500 сўмдан сотилмоқда.