"Арзон Galaxy S8" бугун тақдим қилинади

Бир неча ҳафтадан бери интернет тармоғида Samsung Galaxy S8 Lite смартфони ҳақидаги хабарлар тарқалиб юрибди. Мазкур талқин "Samsung Galaxy S8" моделининг бир оз соддалашган версияси бўлади. Хитойлик инсайдерларнинг ёзишларича, бу талқин нисбатан арзон смартфонни хуш кўрувчиларга мўлжалланган.

Кеча, 2018 йилнинг 20 майида Жанубий Кореяда мазкур мобил алоқа воситасига оид расмий хабар эълон қилинди. Samsung компаниясининг расман берган баёнотига кўра, ушбу янги телефон аппарати "Samsung Galaxy S Light Luxury" деб номланади.

Янги мобил қурилма техник жиҳатдан флагман бўла олмайди ва ҳамёнбоп гаджетлар туркумига мансуб бўлади. Шу билан бирга, унинг ташқи кўриниши флагманларни эслатиб юборади.

Кореялик IT-гигантга кўра, Samsung Galaxy S Light Luxury аппарати расман бугун, яъни 21 майда жамоатчилик эътиборига ҳавола қилинади. Мазкур тақдимот Хитойда бўлиб ўтади. Samsung Galaxy S Light Luxury шу ойнинг якунига қадар савдога чиқарилади.

Арзон ва ҳашамдор кўринишга эга смартфонларни хуш кўрувчиларга мўлжалланган Samsung Galaxy S8 Lite тақдимоти Пекинда бўлиб ўтади. Жанубий кореялик ишлаб чиқарувчи оммавий ахборот воситаларига бунинг учун таклифнома жўнатган.

Ҳозиргача тўпланган маълумотларга кўра, янги телефон аппаратининг 5,8 дюймли Super AMOLED-экранининг пикселлар сиғими Full HD+ бўлади. Гаджетда 8 ядроли Qualcomm Snapdragon 660 процессори ўрнатилади, унинг частота тезлиги 2,2 ГГц.ни ташкил қилади.

Смартфонда USB Type-C порти, 4 гигабайтли тезкор ҳамда 64 гигабайтли UFS 2.1 стандартидаги доимий хотира бўлади.

Шу билан бирга, мазкур мобил алоқа воситасида 16 мегапикселли бир сенсорли бош камера бўлади. Унда лазерли автофокус функцияси бўлмайди. Олд панелда эса 8 мегапикселли селфи камера ўрнатилади.

Samsung Galaxy S8 Light Luxury моделида бармоқ изи сканери орқа панелдан ўрин олган бўлади. Яъни, асл моделдаги каби ноқулай жойда.

Янги девайснинг аккумулятор сиғими 3000 мА соат бўлади. Смартфон қадоқдаёқ Android 8.0 Oreo операцион тизимида ишлайди.

Samsung Galaxy S8 Lite қора ҳамда қизил рангларда ишлаб чиқарилади. Гаджетнинг нархи ҳақида бугун, яъни тақдимотдан сўнг маълумот берамиз.

Сайт янгиликларидан доимий хабардор бўлиш учун Телеграм каналимизга қўшилинг!