Атиги 155 долларлик, аммо «кемтик»ли экран ва қўш камерага эга Redmi 6’ни иш ҳолатидаги «жонли» суратларда кўринг!

Xiaomi компанияси ўзининг ҳамёнбоп смартфонлар туркумига мансуб Redmi 5 моделини нисбатан яқинда – ўтган йилнинг декабрида тақдим этган эди. Бу ва ҳатто ундан кейин намойиш этилган бир қатор моделлар ҳам аллақачон Ўзбекистон бозорларига келиб улгурган.

ЎҚИНГ: Яқиндагина тақдим этилган Xiaomi Redmi S2 ҳам «Малика»га етиб келди, шу ва Redmi Note 5 Pro смартфонлари нархлари билан танишинг (2018 йил 23 май)

Ушбу туркумдаги навбатдаги смартфон – Redmi 6 модели эса янада илғор бўлиши кутилаётир. Бугун интернет кенгликларида тарқалган қуйидаги суратлар айни шу гаджетга тегишли, дея тахмин қилишмоқда.

Кўриб турганингиздек, дисплейнинг тепа қисми ўртасида «ўйиқ» мавжуд. Қизиғи шундаки, ҳозиргача бундай дизайн асосан қимматбаҳо смартфонларда қўлланиб келаётганди, Redmi эса ҳамёнбоп туркум ҳисобланади.

Ушбу «кемтик»да олд камера ва яқинлашув датчиги, улар ўртасида эса кичик ҳажмли суҳбатлашув динамиги чиройли жойлашган.

Суратдаги қурилма – смартфоннинг савдога чиқариладиган модели эмас, балки прототипи бўлса керак. Экраннинг юқори қисмидаги ахборот панелида ёзувларнинг нотўғри кўриниб қолгани, шунингдек, MIUI талқини акс эттирилмагани ҳам шундан далолат бераётир. Эҳтимол, бу модел Xiaomi’нинг график қобиғи сўнгги талқини – MIUI билан тақдим этилар.

ЎҚИНГ: Xiaomi ўз смартфонлари учун MIUI 10 талқинининг тақдимот санасини айтди

Redmi 6 модели дея тахмин қилинаётган бу девайснинг дактилоскопик датчиги орқа панелнинг марказида жойлашган. Юқори чап бурчакда эса қўшалоқ асосий камера модуллари ва улар орасида фоточақноқ тикка блок шаклида жойлашган. Xiaomi’нинг сўнгги моделлари – Redmi Note 5, Redmi S2 ҳамда Mi Mix 2S смартфонларида ҳам худди шундай ечим қўлланган.

Дастлабки маълумотларга қараганда, Redmi 6 смартфони диагонали 6 дюймга тенг, тасвир формати HD+ бўлган экран билан жиҳозланади. Унинг тезкорлигини саккиз ядроли Qualcomm Snapdragon 625 процессори ҳамда 3 гигабайтлик тезкор хотира таъминлаб беради. Унга 999 юань миқдорида нарх белгиланиши кутилаётир, бу эса 155 АҚШ долларига тўғри келади. Шунингдек, Xiaomi ўзининг Redmi 6 моделини ҳам 31 май куни, Mi 7 ва Mi 8 флагман смартфонлари билан бирга тақдим этиши мумкин.

ЎҚИНГ: Xiaomi бирйўла иккита – Mi 7 ҳамда Mi 8 флагманларини тайёрлабди, уларнинг олд панелини «жонли» томоша қиламиз!