Атиги 230 долларлик Vivo Z3 – компаниянинг илк ўйинбоп смартфони тақдим этилди
Бугунги кунда айрим смартфонсозлар айнан геймерларга аталган – ўйинлар ўйнашга мўлжалланган телефонлар ҳам ишлаб чиқаришмоқда. Буни аслида ўйин қурилмалари ишлаб чиқарувчи Razer компанияси ўтган йили бошлаган бўлиб, яқинда у иккинчи геймерофонини ҳам намойиш қилган.
ЎҚИНГ: Илк ўйинбоп смартфоннинг иккинчи авлоди – Razer Phone 2 тақдим этилди
Смартфоннинг дактилоскоп сенсорини илк бора дисплейга жойлай олган Vivo компанияси ҳам ўзининг биринчи ўйинбоп смартфонини намойиш этди. Vivo Z3 русумли ушбу қурилма минимал ромли, томчисимон «тирқиш»ли дисплей дизайнида ишланган.
Vivo Z3 моделига диагонали 6,3 дюймлик, тасвир сифати Full HD+ форматли дисплей ўрнатилган. Томонлари ўзаро 19:9 нисбатли экран эса, ромларининг ўта юпқалиги эвазига корпус олд юзасининг 90,3 фоиз майдонини эгаллаган.
Қизиғи шундаки, мазкур геймерофоннинг иккита версияси ўзаро нафақат хотира ҳажми, балки процессори билан ҳам фарқ қилади. Улардан бирига саккиз ядроли Snapdragon 670 процессори ва 4 гигабайтлик тезкор хотира ўрнатилган бўлса, иккинчисида Snapdragon 710 чипи ҳамда 6 гигабайтлик «оперативка» бор. Афсуски, уларга ҳатто айни дамдаги энг кучли Snapdragon 845 процессори ҳам ўрнатилмаган, ҳолбуки, тез орада мутлақо янги – Snapdragon 855 (янги номи – Snapdragon 8150) чипли смартфонлар тақдим этиладиган бўлиб турибди.
Vivo Z3 – ушбу смартфонсознинг ўйинларда самарадорликни оширувчи Dual-Turbo технологиясига эга илк моделидир. Dual-Turbo ўйинларнинг юкланиш тезлигини оширади ва тизим ресурсларини оптималлаштириш эвазига смартфон самарадорлигини ҳам юксалтиради.
Ўйин мобайнида халақит бермаслиги учун Vivo Z3 созламаларида кирувчи қўнғироқларни ҳамда билдиришномаларни чеклаш функцияси мавжуд. Шунингдек, унда худди геймпадлардагидек, экранда бўлаётган воқеаларга мос тарзда смартфоннинг ўзи титраши каби функцияларни ҳам фаоллаштириб қўйиш мумкин.
Vivo Z3 аккумуляторининг ток сиғими 3315 мА/соатни ташкил этади, бармоқ изи сканери орқа панелида жойлашган. У Android 8.1 Oreo асосида ишлаб чиқилган FunTouch OS 4.5 прошивкасига эга.
Смартфоннинг 12 мегапикселлик олд камераси «сунъий идрок»ли бўлиб, кадрдаги манзарани машина таълими асосида таҳлил қилиш ва олинадиган суратларни яхшилаш қобилиятига эга. Шунингдек, эгасини қиёфасидан таниш орқали смартфон қулфини очишни ҳам билади. Vivo Z3 асосий камераси эса 16 ва 2 мегапикселли иккита датчикни ўз ичига олган. У ҳам «сунъий онг» технологиялари билан бойитилган ва портрет режимини қўллаб-қувватлайди.
«Осмон ости салтанати»да аллақачон Vivo Z3 геймерофони сотувга чиқарилган. Процессори ва тезкор+ички хотира ҳажмидан келиб чиқиб, уни уч хил конфигурацияда таклиф этишмоқда:
- Snapdragon 670 процессори ва 4+64 ГБ хотирали – 230 доллар;
- Snapdragon 710 процессори ва 6+64 ГБ хотирали – 275 доллар;
- Snapdragon 710 процессори ва 6+128 ГБ хотирали – 310 доллар.
ЎҚИНГ: Vivo NEX камерасининг жони қаттиқ экан. Балет раққосасининг сакрашини ҳам кўтарди
