Барча Android ва iOS-гаджетлар учун Telegram иловаси янгиланди!
Ўзбекистонда энг оммабопларидан бўлган Telegram мессенжери шу кеча-кундузда йирик апдейтни тақдим этди. Бу сервиснинг ҳам «тишланган олмали», ҳам «яшил роботчали» девайслар учун ишлаб чиқилган клиентлари янгиланди.
ЎҚИНГ: Кутиб олинг Telegram’дан янгилик!
Айтиш керакки, Telegram’нинг iOS тизимли мобил қурилмалар учун тақдим этилган иловаси 5.1.0 (724) версиясигача, Android-гаджетларга мўлжалланган клиенти эса 5.0 талқинигача янгиланди.
Уларда фойдаланувчилар учун тақдим этилган янги имкониятлар асосан бир хил, лекин «яшил роботчали» тизимдаги Telegram’да сал кўпроқ. Уларни қуйида санаб ўтамиз.
Ҳар иккала платформа учун тегишли ўзгаришлар:
- Яқинда фойдаланувчиларга мессенжерни турли тилларга таржима қилиш имкони тақдим этилганди. Энди мессенжер шу таржималар натижасида translations.telegram.org платформаси орқали яратилган кастом локализацияларни қўллаб-қувватлайдиган бўлди. Бунда ҳавола орқали ўша локализацияга ўтиш имкони ҳам мавжуд. Мессенжерни ўзбек тилига ўгиришга ҳисса қўшишни истаганлар учун ҳавола: https://translations.telegram.org/uz.
- Илова жуда кўплаб турлардаги контентни Instant View 2.0 функцияси орқали қўллаб-қувватлайдиган бўлди. Шунингдек, Instant View шаблонларини ишлаб чиқиш учун қайтадан танлов эълон қилинган.
- «Танланганлар»да ҳамда оддий гуруҳларда энди бирор хабарни бириктириб қўйиш мумкин.
- Икки босқичли аутентификация учун электрон почта манзилини тасдиқлашнинг янгиса тизими жорий этилди. Электрон почтада келган ҳавола орқали ўтиш ўрнига кодлар билан ишлаш йўлга қўйилган.
- Жами 400 дан ошиқ турли майда тузатиш ишлари амалга оширилган.
Юқоридагиларга қўшимча тарзда, Telegram’нинг фақат Android-иловасида амалга оширилган ўзгаришлар:
- Фойдаланувчилар, гуруҳлар ва каналларнинг профиллари янгича кўриниш олган. Унда билдиришномалар ва товушларнинг созламалари соддалаштирилган ва умумий медиага тезкорлик билан уланиш имкони тақдим этилган.
- Плейлистларда ва «Умумий мусиқа» («Общая музыка») қисмида мусиқий альбомлар муқовалари жорий этилган.
- Менюда янги – «Шикоят қилиш» («Пожаловаться») банди қўшилган.
Демак, барча смартфонлар эгалари ўз қурилмаларидаги Telegram иловасини янгилаб олишлари мумкин. Уни янгидан ўрнатиш учун эса iOS-гаджетлар эгалари мана бу, Android-девайслар соҳиблари эса мана бу ҳавола орқали тегишли иловалар каталогига ўтишлари лозим.
