Барча даврларнинг энг нуфузли 10 та телефони билан танишамиз

Барча даврларнинг энг нуфузли 10 та телефони билан танишамиз

Motorola муҳандислари Мартин Купер ва Жон Ф. Митчелл 1973 йил 3 апрелда амалга оширган ихтиролари — мобил телефон инсоният ҳаётига қанчалар таъсир ўтказишини тасаввур ҳам қилмаган бўлса керак. Биринчи мобил телефон бўлган Motorola DynaTAC ўта оғир ва 4,000 доллар нархга эга қўпол қурилма эди. DynaTAC инсониятга мобил телефон тушунчасини таништирган бўлса, биз ҳозир чўнтагимизда олиб юрадиган телефонлар йиллар ўтиши билан кичикроқ ва ҳамёнбопроқ бўлиб бориши билан оммалашиб борди.

ЎҚИНГ: Эгасига жуда узоқ хизмат қилган 5 та афсонавий смартфон. Сиз ҳам уларни ишлатганмисиз?

Хўш, телефон нимаси билан нуфузли бўлади? Сотувлар ҳажми билан эмас, албатта. Нуфузли бўлиши учун телефон янги функция ёки бутунлай ўзгача бир жиҳатга эга бўлиши керак. Ўзидан кейинги авлод телефонларига катта таъсир ўтказиши керак. Қуйида келтирилган 10 та телефонни инсоният ҳозиргача кўрган энг нуфузли телефонлар деб ҳисоблаш мумкин.

1. Motorola StarTAC (1996)

1,000 доллар нархга эга бўлган Motorola StarTAC чиқарилиши биланоқ катта муваффақият келтирган. Мазкур қурилма илк раскладушка телефон бўлиб, бутун дунё бўйлаб жами 60 миллион дона сотилган. Раскладушка сабаб телефон кино оламида ҳам оммалашди — 90-йиллар охиридаги кўплаб кино ва теле-шоуларда ушбу телефон кўриниш берган.

StarTAC йиллар давомида бир неча турли модель кўринишида сотилган ва SMS жўнатиш, вибрацияли огоҳлантириш ҳамда алмаштирса бўладиган аккумуляторга эга бўлган. Қурилма ўз даври учун жуда кичик ўлчамли бўлган ва атиги 88 грамм тош босган. Ўша даврларда 1,000 долларни катта пул деб ҳисобламаганлар учун StarTAC энг мақбул телефон бўлган. StarTAC раскладушкали телефонлар оламида муҳим ўрин касб этган.

2. Nokia 9000 Communicator (1996)

Nokia 9000 Communicator ўз замонидан олдиндаги телефон эди ва шубҳасиз бизнинг рўйхатдан ўрин эгаллади. Функциялари борасида мазкур қурилмани замонавий смартфонларнинг аждоди дейиш мумкин, лекин форма фактори борасида бундай деб бўлмайди, боиси Nokia 9000 Communicator ён томонга сурилувчи раскладушка модель бўлган. Телефон кичик лептоп ва маълумот узатиш модеми уйғунлиги бўлиб, асосан, бизнесменлар учун мўлжалланган.

Телефоннинг асосий жиҳатлари қаторига 24MHz Intel CPU ҳамда иловалар ва фойдаланувчи маълумотларини сақлаш учун 8МБ хотирани киритиш мумкин. Nokia 9000 Communicator, шунингдек, тўлиқ ўлчамли QWERTY клавиатураси ва 640х200 дисплейи билан ҳам мақтана олган. Қурилманинг олд томони тўлиқ функционал телефон бўлган бўлса, корпус остида эмаил жўнатиш ва қабул қилиш, интернетга кириш ва иловалар ишлатиш имконини берган ақлли платформа жойлашган. Телефон оғирлиги 397 грамм бўлган.

Сотувга чиққан пайти телефон 1,000 доллар нархга эга эди. Мазкур моделдан кейин яна бир неча шунга ўхшаш телефонлар чиқарилган. Nokia 9000 Communicator 2005 йиллар атрофида оммабоп бўлган илғор хабарлашув телефонларининг эталони бўлиб хизмат қилган.

3. Nokia 3310 (2000)

Nokia 3310 икки жиҳати билан ажралиб турган: а) афсонавий даражада чидамлилик; б) ҳозирги тезкор мессенжерлар каби хабарлашув функцияси билан. 3310 модели шундоқ ҳам оммабоп бўлган Nokia 3210'нинг янгиланган талқини эди. Бироқ қурилма кўп жиҳатларни бир қадам олдинга олиб чиқди.

Телефонда оддий 160 та белги билан чегараланган SMS'дагидан кўра узунроқ хабарлар жўнатиш учун махсус чат иловаси бор эди. Бу эса телефонни чат ишқибозлари орасида роса оммалаштирган.

Nokia ўзининг 3310 телефонини махсус ҳимояланган телефон сифатида реклама қилмаган бўлса-да, аслида шундайлигига шубҳа йўқ. Телефоннинг ташқи пластик корпуси ҳар қандай зарбага бардош бера оларди. Nokia 3310 учун, шунингдек, Xpress чехоллар ҳам чиқарилган бўлиб, улар ёрдамида фойдаланувчилар телефон ранги ва безакларини ўзларига мослаштириши мумкин бўлган.

Nokia, бундан ташқари, бошқа ёқимли функциялар, масалан, эслатмалар иловаси, секундомер, калькулятор ва Snake каби бир неча ўйинларни ҳам телефонга ўрнатган.

Глобал сотувлари 126 миллион бўлган 3310 модели 160 миллион дона сотилган 3210'дек тижорий муваффақият келтирмаган бўлса-да, нуфузли телефон сифатида тарихда қолган.

4. Palm/Handspring Treo 180 (2002)

Баъзилар Treo линейкасидаги қайси модель энг аҳамиятли экани борасида баҳслашиши мумкин, бироқ айнан Treo 180 модели овозли қўнғироқ имкониятлари ва рақамли шахсий ассистентни битта қурилмага бирлаштирган. Бунинг ўзи Palm ва Handspring компаниялари учун илк катта қадам эди.

Ушбу ўзига хос аппарат монохром, резистив тачскрин ва QWERTY клавиатураси, шунингдек, экранни қоплаб турган тепага очилувчи, қўнғироқ пайти иккиламчи карнай вазифасини бажарадиган қопқоққа ҳам эга эди. Бошқа жиҳатлар қаторига 16МБ хотира ва 33MHz Dragonball процессори кирган. Айнан мана шу телефон 2000 йилларда бизнесменлар орасида оммалашган кейинги авлод Treo қурилмалари, жумладан, Treo 600 ва 650 яралиши учун замин бўлиб хизмат қилган.

5. Motorola RAZR (2004)

Motorola RAZR кўпчилик харид қилишни хоҳлаган телефон бўлган ва бу билан қурилма бизнинг рўйхатдан мустаҳкам ўрин эгаллади. Телефон раскладушкали форма фактори, нафис чизиқлар ва металл корпусга эга бўлган. RAZR 400 доллардан сотилган.

Телефонни энг муҳим мода телефонларидан дейиш мумкин. Қурилма 130 миллион дона сотилган. Машҳурлар орасида ва Голливудда оммалашган StarTAC сингари RAZR ҳам кейинчалик яна бир неча талқинда қайта чиқарилган. RAZR ўз даври иконкаси эса. Моторолаъдагилар ўтган йили RAZR телефонининг янгича — буклама смартфон талқинини намойиш қилди.

ЎҚИНГ: Энг кучли аккумуляторга эга 10 смартфон

6. BlackBerry Curve (2007)

Palm'нинг Treo линейкаси каби, энг нуфузли BlackBerry телефони қайси экани ҳақида куни бўйи баҳслашиш мумкин. Бизнингча, Curve энг муҳим BlackBerry телефони бўлган. Боиси, мазкур қурилма билан она компания Research In Motion (RIM) кенг оммага илк бора ёқа бошлаган. Curve RIM учун катта муваффақият олиб келгани сабабли компания мазкур моделни келаси йиллар давомида бир неча талқинда сотган.

BlackBerry Curve кўпчилик ишлатган илк смартфон бўлган.

Curve ўша пайтда оммалашган BlackBerry Pearl'нинг трекболига эга эди ва олдинги BlackBerry'ларга қараганда фойдаланишга қулай интерфейс билан таъминланган. Қурилма тўлиқ ҚWЭРТЙ клавиатураси ва рангли экран билан жиҳозланган. Қолган техник кўрсаткичлар қаторига 312MHz процессор, 64МБ хотира, 16МБ тезкор хотира ва камера кабилар кирган. Баъзи вариантларда ҳатто Wi-Fi ёки GPS ҳам бўлган. Юқорида айтилганидек, BlackBerry Curve кўпчиликнинг илк смартфони эди.

7. Apple iPhone (2007)

Илк iPhone эҳтимол ҳозиргача тақдим қилинган энг нуфузли мобил қурилма бўлса керак. Тўғри, смартфон савдоси энг муваффақиятли эмасди, қурилманинг аппарат таъминоти ҳам энг зўри эмасди, лекин биринчи iPhone битта қурилмада бир неча ғоялар муваффақият билан жам қилинган илк телефон бўлган.

Apple киритган энг катта ўзгариш тўлиқ экранли дизайн эди. Тўғри, ўша даврда бошқа телефонлар ҳам катта экранга эга эди, лекин уларнинг аксариятида интерфейс ҳали ҳам тугмачалар билан бошқарилар эди. iPhone'да эса бутунбошли интерфейсни тачскиннинг ўзи билан назорат қилиш имкони пайдо бўлган. Уй тугмаси фақат иловалардан чиқиш ва бош ойнага ўтиш вазифасини бажарган. Apple киритган яна бир катта ўзгариш (деярли) тўлиқ қувватли браузер бўлган. iPhone'даги браузер ўша пайтдаги (веб-сайтлардаги фақат матннигина очиб берувчи) бошқа телефонларга қараганда анчайин бой веб-браузинг амалиётини тақдим этган. iPhone, шунингдек, ўша даврда катта янгилик бўлган iTunes Music Store билан ҳам интеграллашган.

Биринчи iPhone қолган iPhone'лар ва App Store'га тамал тошини қўйиб берди. Шу билан, фойдаланувчиларнинг мобил иловаларни ишлатиш усули бутунлай ўзгарди.

8. HTC Dream / T-Mobile G1 (2008)

Илк Android смартфонни қандай севмаслик мумкин? HTC Dream Дреам (ёки T-Mobile G1) смартфони бозор юзини кўрган илк Android смартфон бўлган. Лекин, афсуски, қурилма жуда ҳам чалкашликларга кўп эди.

Аппарат таъминоти сифати қуйи даражада бўлиб, экран тепага сурилган. QWERTY клавиатураси тугмалари қаттиқ бўлган, қурилманинг умумий ишлаши ҳам барқарор эмасди. Шундай бўлса-да, бундан кўп нарсани ўргандик. Масалан, Android'ни root қилиш мумкинлигини кўпчилик билиб қолади. Натижада, смартфон дастурчилар орасида жуда оммалашади.

Dream модели HTC'нинг энг яхши маҳсулоти бўлмаслиги мумкин, лекин қурилма HTC'ни илк Android смартфон ишлаб чиқарган компания сифатида тарихга муҳрлаб, Android амалиёти қанақа бўлишини бизга кўрсатиб берди.

9. Google Nexus One (2010)

HTC ишлаб чиқарган Nexus One қурилмаси Google буюртмаси билан тайёрланган ва 2010 йил бошларида тақдим қилинган. Смартфон HTC интерфейсига эга бўлмаган соф Android тизимида ишлаган илк қурилма бўлган.

Google'нинг Nexus One модели бошқа бир неча жиҳатдан ҳам биринчи бўлган. Google смартфонни мижозларга тўғридан-тўғри сотган, қурилмалар қулфланган бўлмаган ва уларда исталган SIM картани ишлатиш мумкин бўлган. Мазкур модель Google Store ва Nexus (кейинчалик Pixel) линейкаси яралаши учун асос бўлиб хизмат қилган. Android оламида ушбу смартфон жуда нуфузли бўлган.

10. Samsung Galaxy Note (2011)

Энг сўнгги ўринда 2011 йил чиқарилган оригинал Samsung Galaxy Note смартфони. Мазкур смартфон Samsung учун катта қадам бўлган. Компания бутунлай ўзгача янгилик қилиб, катта экран ва стилусга эга смартфон ғоясини оммалаштирди. Ҳар йили Samsung янги Note смартфонини ишлаб чиқариб келмоқда (афсус, бу йил янги Note бўлмайди). Note линейкаси кореялик компаниянинг дизайн, технология ва дастурий таъминот борасида эришган энг сўнгги муваффақиятларини ўзида жамлайди.

Note тақдим қилинганидан кўп ўтмай, смартфонлар экранининг ўртача ҳажми катталаша бошлади. Ҳатто Apple ҳам Нотеълар йўлидан бориб, iPhone 6 Plus'ни чиқарган. Samsung Galaxy Note катта экранли смартфонлар даврини бошлаб бергани билан бизнинг рўйхатдан ўрин эгаллади.

Шундай қилиб, барча даврларнинг энг нуфузли ва аҳамиятли 10 та телефони билан танишиб чиқдик. Бундан-да қизиқарли контент учун бизни кузатишда давом этинг.

ЎҚИНГ: Samsung Galaxy S смартфонлари: энг ёмонидан энг яхшисигача

Terabayt.uz сайтининг видеолари: Youtube'даги каналимизда!