Бешта моделдаги айфон тугатилиб, iPhone 7 ва iPhone 8’лар арзонлашяпти

Apple корпорацияси ихчам iPhone SE моделини ҳамда iPhone 6 туркумидаги смартфонларини ишлаб чиқаришдан олиб ташлаётгани ҳақида миш-мишлар пайдо бўлганди. Айфонларнинг бутловчи қисмларини етказиб бериш тизимидаги ўз манбаларига таяниб хитой нашрлари буни тасдиқлаган.

ЎҚИНГ: Apple’нинг энг кўп сотилаётган гаджети маълум бўлди – бу iPhone эмас!

Аниқроқ қилиб айтадиган бўлсак, Apple шу йилнинг 3 май санасидан iPhone SE, iPhone 6, iPhone 6 Plus, iPhone 6S ҳамда iPhone 6S Plus моделларини ишлаб чиқаришни тўхтатган.

Ушбу русумлардаги айфонлар 2014 йилдан 2016 йилгача бўлган муддатда тақдим этилган – демак, улар ўз вазифаларини бажариб бўлишган. Хабарга кўра, iPhone 6 туркумидаги смартфонлардан шу кунгача жами 250 миллион донадан ошиқ сотилган. Яъни, бу – Apple’нинг энг кўп сотилган айфонларидандир. Шу боис ҳам купертинолик корпорация мазкур смартфонларнинг ишлаб чиқарилишини тўхтатишдан аввал, сотилганларини таъмирлашда асқотиши учун уларнинг бутловчи қисмларидан етарлича ғамлаб ҳам қўйган.

iPhone SE ҳамда олтинчи авлод айфонларини ишлаб чиқариш тўхтатилгач, кузатувчиларнинг фикрича, iPhone 7 ҳамда iPhone 8 туркумларидаги смартфонлар арзонлашуви кутилмоқда. Зеро, аввалги моделлар белгилаб турган энг арзон айфон мақоми энди шуларга қолди ва Apple ҳамиша ўз мижозлари учун нисбатан арзон смартфонларни ҳам таклиф этиб келади.

ЎҚИНГ: Terashop.uz’да iPhone’лар ҳам арзонлашди – нархлар билан танишинг! (2019 йил 30 апрель)