Бешта объективли инқилобий камерага эга Nokia 10’нинг илк суратларини томоша қиламиз!

HMD Global компанияси MWC 2018 кўргазмасида камида иккита смартфон тақдим этиши режалаштирилган. Булардан бири кўпдан бери кутилаётган Nokia 9 модели бўлса, иккинчиси ҳали яқиндагина – дастлаб Nokia X номи билан маълум бўлган инқилобий Nokia 10 қурилмасидир.

ЎҚИНГ: Беш камерали илк смартфон – Nokia X яна бир хусусияти билан дунёда тенгсиз

Nokia 9 русумли телефондан фарқли равишда, Nokia 10 мазкур бренднинг ҳақиқий инқилобий флагман бўлади ва Galaxy S9, LG G7, iPhone X сингари энг юксак тоифали смартфонлар билан беллаша олади. У нафақат 2,8 ГГц такт частотасида ишловчи 8 ядроли илғор Snapdragon 845 процессори ҳамда 8 гигабайт ҳажмли тезкор хотираси билан, балки бешта сенсорга эга асосий камераси билан ҳам мақтана олади.

Интернет кенгликларида Nokia 10 флагманининг илк суратлари пайдо бўлди. Айтиш керакки, смартфон корпусининг орқа тарафи чиндан ҳам ҳайратларга лойиқ. Аввало, хитойлик инсайдерлар бу қурилманинг Nokia билан таққосланган қуйидаги суратини ошкор этишди:

Гувоҳи бўлиб турганингиздек, бу ерда бешта объектив кўринмайди. Аммо гап бошқа ёқда: Nokia 10 асосий камераси ростдан ҳам бешта модулдан иборат, фақат бир вақтнинг ўзида улардан иккитасигина ишлайди. Қолганлари эса камеранинг махсус доирасимон қопқоғи остида туради. Фойдаланувчига суратга тушириш учун қандай эффект керак бўлса, шундан келиб чиқиб камера объективлари автоматик тарзда айланиб, ўзаро ўрин алмашади. Бу эса, масалан, орқа фонни ғира-шира қилиш эффекти билан портрет режимида, сифатни йўқотмаган ҳолда 4 каррали зум билан, кенг бурчакли ракурсда ва ҳоказо усулларда расмлар олиш имконини беради.

Шундан келиб чиқиб, ушбу смартфоннинг рендер-суратлари ҳам тарқалган.

Nokia 10’нинг айнан мана шу бешта сенсорли асосий камераси унинг «кузир»и ҳисобланади. Ҳозиргача бозорга тақдим этилган бирорта мобил қурилма бундай хусусиятга эга эмас.

Аммо MWC 2018 тадбирида бу моделнинг асосий рақобатчилари ҳам айнан камерасининг кучлилиги билан етакчиликка интилишмоқда. Дейлик, Galaxy S9 флагмани биттагина объективли камерага эга бўлса-да, Samsung унинг тақдимот тадбири учун тарқатган таклифномасида унга асосий урғуни берган.

ЎҚИНГ: Samsung расман Galaxy S9 тақдимотига таклиф қилди

Шу билан бирга, камера борасида устунликка интилаётган смартфонлардан яна бири кучли «хитойлик» – Huawei P20 флагмани бўлади. У учта объективли ҳамда 40 мегапикселли камерага эга жаҳоннинг илк мобил девайси бўлиши кутилмоқда. Мазкур хусусияти шарофати билан у тасвир сифатини сақлаган ҳолда 4 каррали зум, шунингдек бир қатор бетакрор эффектларни қўллаб-қувватлаши айтилаётир.

ЎҚИНГ: Huawei P20 – дунёдаги энг қудратли фантастик смартфон бўлади

Табиийки, смартфонлардаги кучли камера ва бошқа инновацион жиҳатлар асосан журналистларни ва брендлар фанатларини қизиқтиради. Аммо оддий фойдаланувчи учун булар қанчалик аҳамиятли бўлишини ҳали вақт кўрсатади.

Бунинг устига, юксак технологияларга бой флагманларнинг нархи ҳам анча юқори бўлиб, уларни унча-мунча одамнинг «чўнтаги кўтариши» қийин.

ЎҚИНГ: Энг қимматбаҳо 20та смартфон нархлари (2018 йил 27 январь)