Бетакрор ва қулай Opera Touch браузери 1 октябрдан iPhone’лар учун ҳам чиқади

Opera Software дастурчилари ушбу браузернинг янгича талқини – Opera Touch иловасини шу йилнинг баҳорида чиқаришган эди. Компаниянинг расмий блогида хабар қилинишича, энди уни iOS тизимли қурилмалар учун ҳам тақдим этишаётир.

ЎҚИНГ: Қарши олинг: Opera Touch – битта қўлда бошқаришга мосланган мобил браузер!

Бошқа браузерлардан фарқли равишда, Opera Touch биттагина қўл ёрдамида бошқаришга мосланган. Интерфейсининг пастки қисмида тезкор кириш тугмачаси – FAB (Fast Action Button) жойлашган. Шунинг ўзидан қидирувни тезда очиш мумкин. Агарда уни салгина босиб турилса ва бирор томонга сурилса, тегишли равишда бир неча функциялардан бирини бажаради: яқинда ёпилган варақаларга ўтиш, саҳифани янгилаш, жорий варақани ёпиш ёки компьютерга жўнатиш каби.

Булардан ташқари, Opera Touch иловасида хавфсизликни таъминлаш учун энг янги технологиялар қўлланган. Браузерда рекламани блоклаш функциясиям бор: уни ёқиб қўйсангиз, илова реклама баннерларини чеклаб қўяди. Натижада саҳифалар янада тезроқ очилади ва трафик ҳам тежалади.

«Opera Touch – анъанавий веб-браузерларни майдонга чорловчи мутлақо янги браузер... Август ойида у бетакрор фойдаланувчи интерфейси учун Red Dot Design Award совринини қўлга киритди», – дейишади ишлаб чиқувчилар.

ЎҚИНГ: Турли браузерларда махфийлик режимини ёқишнинг энг оддий усули