Билиб қўйинг: 2 мартдан тўлов терминаллари учун воситачилик ҳақи жорий этиляпти!

Ўзбекистонда 2 мартдан тўлов терминаллари учун воситачилик ҳақи жорий этилади. Мамлакатнинг барча савдо ва хизмат кўрсатиш субъектлари учун ўрнатилган тўлов терминаллари инфратузилмасида савдо тушумининг 0,2 фоизи миқдорида воситачилик ҳақи киритилади. Бу ҳақда Марказий банк Матбуот хизмати хабар бермоқда.

ЎҚИНГ: Картадан-картага пул ўтказишнинг 50% арзон йўлини биласизми?

Банк карталари орқали тўловлар амалга оширилишида халқаро тажриба бўйича воситачилик ҳақи, қоида тариқасида, банк картаси сақловчисидан (эгасидан) эмас, балки тўловларни қабул қилувчи савдо ва хизмат кўрсатиш субъектларидан олинади. Ушбу воситачилик ҳақи банкларга тўлов инфратузилмасига хизмат кўрсатиш билан боғлиқ харажатларини қоплаш ва банклараро воситачилик ҳақини тўлаш имконини беради.

Ҳозирда хорижий давлатларда банк воситачилик ҳақининг миқдори тўлов воситаларининг турларига (дебет/кредит карталари, интернет орқали онлайн тўловлар ва ҳ.к.), субъектларнинг фаолият турига (давлат ташкилотлари, супермаркетлар, авиакассалар, меҳмонхоналар, ресторанлар, дорихоналар) боғлиқ бўлиб, одатда 1 фоиздан 3 фоизгача белгиланади.

Ўз навбатида, тўлов тизимларига бепул хизмат кўрсатилиши халқаро стандартлар талабларига мос келмайди, шунингдек, тўлов хизматлари ва тўлов инфратузилмасини ривожлантиришни, янги тўлов маҳсулотларига инвестиция киритишни рағбатлантирмайди.

ЎҚИНГ: Click билан «қилиқ қилган» шовотлик «шоввоз» қўлга тушди

Шу муносабат билан, халқаро тажрибадан келиб чиқиб, банк хизматларини бозор механизмларига ўтказиш мақсадида тижорат банклари ва тўлов тизимлари операторлари билан келишилган ҳолда, 2020 йил 2 мартдан бошлаб мамлакатнинг барча савдо ва хизмат кўрсатиш субъектлари учун ўрнатилган тўлов терминаллари инфратузилмасида савдо тушумининг 0,2 фоизи миқдорида воситачилик ҳақи киритилиши тўғрисида қарор қабул қилинди.

Бу тадбир бир томондан тўлов инфратузилмасини ривожлантириш учун харажатларни қисман қоплашга, бошқа томондан банк карталари ёрдамида тўловларни мунтазам амалга оширувчи мижозларга турли бонус, дисконт ва рағбатлантирувчи дастурларни (кешбэклар) таклиф қилишга имконият яратади, пировард натижада эса, нақд пулсиз ҳисоб-китобларнинг кўпайишига олиб келади, дейилади хабарда.

ЎҚИНГ: Йўқолган ё ўғирланган пластик картангизни қандай блоклаб қўйишни биласизми?