Бир объективли Galaxy S8 бош камераси “қўш кўзли” LG G6 ва iPhone 7 Plus’га қарши
Samsung компанияси Galaxy S8’да бугунги смартфон саноатидаги тенденцияни четлаб ўтиб, ушбу флагманни қўш объективли бош камера билан таъминламаган. Ушбу смартфон камералари ўртасидаги жангда иштирок этаётган унинг рақибларида эса бош камерада иккита модул ўрнатилган.
Қўш объективли бош камеранинг энг фойдали жиҳати – оптик яқинлаштириш функциясидир. Объектларни унинг ёрдамида сифатини йўқотмаган ҳолда, яқинлаштириш мумкин. Мисол учун, бу борада Huawei P10, iPhone 7 Plus ҳамда LG G6’да бу жиҳат татбиқ этилган. Galaxy S8 бу имконияга эга эмас. Хўш, бош камера масаласида Samsung’нинг “энг инновацион смартфони” ютқазиши мумкинми?
Galaxy S7’да бўлгани каби, бу гал ҳам Dual Pixel технологияси, F1.7 ёруғлик ўтказувчи линзадан фойдаланилган. Бош камеранинг тасвирга олиш сифатини бу борада етакчи ҳисобланган камерафонлар билан таққослаб, хулоса чиқарамиз.
Қуйидаги бир хил пайт ва шароитда олинган суратларда барча смартфтонларнинг камералари суратга олиш иловаси томонидан автоматик тарзда созланган.
Портрет жанри
Қуйидаги портретлар бино ичкарисида олинган. Бу жанрда юздаги ранг-туснинг меъёрига қараб камера имкониятига тезда баҳо берса бўлади. LG камера модули муҳрланган суратда соч толалари қоришиб, қорайиб кетган. Камеранинг юзга ранг бериши ҳам нотабиий. Шу боис, “қўш кўзли” LG G6’ни охирги ўринга муносиб, деб топдик. iPhone смартфонининг камераси олган суратда юздаги ғадир-будирлик шундоққина сезилиб турибди, яъни тасвир ҳаддан ташқари равшан олинган.
Ғолиб – Samsung: юздаги ранг-тус меъёри жойида, тишлар ранги табиий оқ, соч толалари яхши қайта ишланган. Қолаверса, умумий манзаранинг тасвирланиши ҳам янги смартфонда сифатли акс этган.
LG G6
Galaxy S8
iPhone 7 Plus
Кундузги манзара
Кундузги, ёруғлик етарли шароитда барча смартфонлар олган суратлар сифат жиҳатидан бир-бирига ўхшаш: бундай шароит ҳар қандай камерафонгаям ўзини кўрсатиши учун айни муддао.
Аммо, янги, ўзига хос жиҳатлар ҳам йўқ эмас. Фотосуратлардан кўриниб турибдики, LG флагмани бу гал ўзининг иқтидорини намойиш қилган. Бош камерадаги кичик сенсориш берган. Унинг олган суратида осмоннинг тиниқ акс этиши, бино рангининг ёрқинлигини ҳис қилиш мумкин. iPhone олган тасвир жуда қорайиб кетган. Samsung’да эса деталлар “ейилиб” кетган, тасвир бир оз хирадек.
Матн
Матнни тасвирга олиш учун ҳам смартфонларни ичкарига таклиф қилдик. Боиси, шунда энг юқори имкониятлар яққол акс этади. Ва, яна LG’да матн қорайиб акс этди, Samsung’да эса кадр четидаги сўзларда хиралик мавжуд. Матн фонидаги оқ ранг тусидан ҳам кўриниб турибдики, ғолиблик бу гал iPhone смартфонига насиб қилди. Муҳими, унинг камера модули матннинг барча майдонига аниқлик ва ёрқинликни бир хилда тақсимлаган.
Яқиндан тасвирга олиш
Бир қараганда iPhone, LG ҳамда Samsung смартфонларида олинган ҳар учала сурат ёмон чиқмаган. Аммо, уларни янада яқинлаштирадиган бўлсак, iPhone олган суратнинг яхши чиққанига гувоҳ бўламиз. Samsung ва LG смартфонлари олган суратда объектдаги бошқарув элементлари қоришиб кетган. Айфон камерасининг бу шароитдаги ранг-тус бериш қобилияти ҳам табиий чиққан.
Тасвирдаги ёзувнинг аниқлигидан кўриниб турибдики, америкалик смартфон объектни фокуслашда ҳам тенгсиз. Бу борада 2-ўрин LG’га, кейинги ўрин Samsung девайсига насиб қилди.
Бино ичкарисида тасвирга оламиз
Ичкарига киришмиз билан илғор iPhone яна уялиб қолди. У олган сурат бу гал ҳам қоронғу акс этган. LG бу гал тенгсиз. Хусусан, суратдаги йўналиш ёзувларига диққат қилсангиз, аниқ-тиниқ акс этган. Samsung’га бу гал 3-ўрин насиб қилди.
Хулоса
Кўриниб турибдики, Samsung компанияси бу йил бир оз дангасалик қилиб, Galaxy S8’ни ҳам сифат жиҳатидан 2016 йилнинг қаҳрамони бўлган Galaxy S7 ва Note 7’га ўрнатилган камералар билан таъминлаган. Камера ичкарида суратга олиш, кичик объектларни суратга олишда қўш объективли рақибларидан кучсиз эканлигини кўрсатиб қўйди.
Samsung флагман смартфони фақатгина портрет суратга олишда, ташқарида олинган суратларнинг сифати бўйича яхши натижа кўрсата олди, холос. Компания ҳозирча камера иловасини қайта ишлаётганини айтган. Кўрамиз, эҳтимол ўшанда Galaxy S8 камерасининг чинакам имкониятлари юзага чиқар.
