«Бизнес-акселератор» ўқув-амалий марказида Болалар инновацион технопарки ташкил қилинади
Норматив-ҳуқуқий ҳужжатлар лойиҳаси муҳокамаси порталида Вазирлар Маҳкамасининг «Бизнес-акселератор ўқув-амалий маркази фаолиятини ташкил этиш тўғрисида»ги қарори лойиҳаси жойлаштирилди. Бу тўғрида Инновацион ривожланиш вазирлиги хабар бермоқда.
ЎҚИНГ: Пойтахтимизда «Оқлон» технопарки очилди
Ҳужжатга кўра Ўзбекистон Республикаси Инновацион ривожланиш вазирлиги, Савдо-саноат палатаси ва Сирдарё вилоят ҳокимлигининг Ўзбекистон Республикаси Инновацион ривожланиш вазирлиги ҳузуридаги Инновацион ишланмаларни жорий этиш илмий-амалий маркази қошида давлат муассасаси шаклидаги мактабгача ёшдаги болалар инновацион технопаркини ўз ичига олган «Бизнес-акселератор» ўқув-амалий марказини (кейинги ўринларда – Марказ) ташкил этиш тўғрисидаги таклифига розилик берилиши мумкин.
Марказнинг асосий вазифалари:
- юқори малакали мутахассисларни жалб қилган ҳолда бозор иқтисодиёти тамойилларига мос келувчи ўқув курсларини ташкил этиш;
- мактабгача таълим муассасалари тарбияланувчилари учун Болалар инновацион технопаркини ташкил қилиш ва фаолиятини таъминлаш;
- Сирдарё вилоятида кичик ишлаб чиқариш тадбиркорлик субъектларини ташкил этишга кўмаклашиш ва маркетинг соҳасида билим бериш;
- ёшларда тадбиркорликка бўлган қизиқишни уйғотиш, бизнесни юритиш қоидаларини ўргатиш ва норматив-ҳуқуқий ҳужжатлар билан ишлаш бўйича амалий кўникмаларни шакллантириш;
- қулай муҳитда ёш тадбиркорларнинг бизнесини йўлга қўйиш орқали қўшимча иш ўринларини яратишга кўмаклашиш;
- замонавий ахборот ва инновацион педагогик технологиялардан кенг фойдаланган ҳолда ўқитишни ташкил этиш;
- ўқув курсларини тамомлаган ёшларга тадбиркорлик фаолиятини йўлга қўйиш учун инвесторларни топишга кўмаклашиш;
- замонавий билимлар асосида ўсиб келаётган ёш авлодда футуристик дунё қарашни шакллантириш.
Қонун лойиҳасида келтирилишича, Марказни жойлаштириш ва фаолиятини ташкил этиш учун Сирдарё вилояти, Сирдарё шаҳри, Ўзбекистон кўчаси, 86-уйда жойлашган Педагогика коллежига қарашли бўлган 1- ва 2-сон талабалар ётоқхонаси бинолари (кейинги ўринларда – объект) Инновацион ривожланиш вазирлиги ҳузуридаги Инновацион ишланмаларни жорий этиш илмий-амалий Марказга оператив бошқарув ҳуқуқи билан бепул берилади.
Ҳужжатга кўра, хусусан, Тижорат банклари Савдо-саноат палатаси билан биргаликда ўқув курсларини тамомлаган ёшлар учун технологик ускуналар ҳамда жиҳозлар сотиб олиш ва ўз тадбиркорлик фаолиятини ташкил қилишлари учун кредит ажратилишини таъминлаш ҳам кўзда тутилган.
ЎҚИНГ: Мирзаободда ҳам «Рақамли технологиялар маркази» очилди