Blackberry Android’да ишлайдиган иккинчи QWERTY смартфонни чиқаради
Канаданинг Blackberry фирмаси бир йилдан буён ўзининг операцион тизимидан чекиниб, Android’да ишлайдиган қурилмаларни тайёрламоқда. Компания бундан бир неча кун аввал кучли техник параметрларга эга Blackberry DTEK60 моделини тақдим қилган эди.
3D News нашрининг ёзишича, айни вақтда фирма Mercury коди остида Blackberry DTEK70 смартфонини ишлаб чиқмоқда. Модель 2017 йилнинг биринчи чорагида намойиш этилиши мумкин.
Шундай бўлса-да, Geekbench бенчмаркида смартфонга тегишли баъзи муҳим тафсилотлар эълон қилинди. Модель 4,5 дюймли HD экран ва механик QWERTY клавиатурага эга бўлади. Унга бир кристалли такт частотаси 2,02 бўлган Qualcomm Snapdragon 625 процессори, 3 ГБ оператив ва 32 ГБ доимий хотира ўрнатилади.
Шунингдек, модель 18 МПли асосий ва 8 МПли олд камера билан жиҳозланади. Аккумуляторининг сиғими – 3400 мА/соат. Ҳозирда мавжуд маълумотга кўра, бармоқ изи сканери клавиатурадаги бўшлиқ тугмасида жойлашади.
