Бу сафар 100% аниқ ва тиниқ: Internet Explorer бизни бизни бир умрга тарк этди
Сўнгги йилларда Microsoft'нинг Internet Explorer браузери ана "ўлди", мана "ўлди" каби хабарлар шу қадар кўп чиқдики, уларни санаб саноқда адашиб кетасан киши. Чунки Microsoft бу ишни йилдан йилга чўзиб келаётган эди. Мана ўша кун ҳам келди. Бугундан бошлаб Microsoft ўзининг Windows 10 операцион тизимида ишлайдиган компютерларида Internet Explorer 11 браузерини тўлиқ, 100% ўчирмоқда.
Microsoft ўзининг ҳозирги Edge браузери учун янгиланиш чиқарди. Ушбу янгиланишни қабул қилганингиздан сўнг сиз Windows 10 компютерингизда Internet Explorer браузерини оча олмайсиз. Агар бунга ҳаракат қилсангиз "Internet Explorer келажаги Microsoft Edge'да" матнли баннерни кўрасиз. Ўзгариш барча учун автоматик равишда қўлланилади ва буни қайтаришнинг иложи йўқ.
Айтиш керакки, Microsoft илк маротаба 2015 йилда, Windows 10 ва у билан бирга Edge браузерини чиқариш билан Internet Explorer брендидан воз кечаётганлиги маълум бўлган эди. Internet Explorer'нинг ўчирилиши ҳақидаги биринчи хабарлар 2020 йилда пайдо бўлди. Шундан сўнг компания 2022 йил июн ойида эски браузерини янгиси эвазига қўллаб-қувватлашни тўхтатди. Кеча Microsoft Edge учун чиқарилган янгиланиш эса Windows'нинг барча версияларида (LTSC ва Хитой ҳукумати версияларидан ташқари) IE браузерини ишга туширишдан маҳрум қилди. Internet Explorer бизни бир умрга тарк этди. Алвидо!
