Бу сафар расман: Galaxy S23 смартфонлари тақдим қилинди!

Бу сафар расман: Galaxy S23 смартфонлари тақдим қилинди!

Узоқ кутишлар ва январ ойи тўла маълумотлар тарқатилишидан сўнг Samsung ваниҳоят ўзининг 2023 йил учун янги авлод флагманларини тақдим қилди. Galaxy S23, Galaxy S23+ ва Galaxy S23 Ultra смартфонлари янгиланган дизайн, яхшиланган техник хусусиятлар ва кучли камераларда, лекин ўзгармаган нархда тақдим қилинди.

Samsung Galaxy S23 смартфонлари капот остида янги чипсетдан бошлаб янги хусусиятларга эга. Бир неча йилдан бери Samsung илк маротаба ўзининг флагман смартфонларининг барча моделлари учун фақат битта чипдан фойдаланмоқда. Galaxy S23, Galaxy S23+ ва Galaxy S23 Ultra смартфонлари Qualcomm фақатгина улар учун махсус ишлаб чиққан "Snapdragon 8 Gen 2 for Galaxy" чипсети билан жиҳозланган ва бу барча ҳудудлар, АҚШдан тортиб Европа моделларигача тааллуқлидир. Айтиш керакки, бу ҳозирги Android смартфонлар учун мавжуд бўлган энг кучлиги Snapdragon чипсети ҳисобланади.

Сериядаги энг кичкина модел, Galaxy S23, ўтган йилгисига қараганда анча ёрқинроқ дисплейга эга. Унинг FHD+ резолюцияли 6.1 дюйм ўлчамдаги экрани 120 герц янгиланиш тезлигига эга ва у 1750 нит ёрқинликкача чиқа олади. Шунингдек, унинг батареясига кучига янада кўпроқ куч қўшилган: смартфон 3900 мА/соат батарея сиғимига эга. Бу ўтган йилги худди шу модел батареясидан 200 мА/соатга кўпроқ. Агар батарея қуввати тугаб қолса уни 25 Вт тезликда симли ёки 15 Вт тезликда симсиз зарядлаб олиш мумкин.

Galaxy S23+ моделига келадиган бўлсак, унинг 6.6 дюймли экрани оддий моделники каби хусусиятларга эга. Plus модел ҳам батарея борасида 200 мА/соат "+"га эга, яъни у 4700 мА/соат батарея билан жиҳозланган ва уни 45 Вт тезликда зарядлаш мумкин.

Иккала модел ҳам бир хил дизайн ва камера жойлашувига эга. Селфилар учун мўлжалланган олд камера 12МП ва у 4К форматида секундига 60 кадр тезликда видеога олиши мумкин. Орқа томонда эса Galaxy S22 билан чиқарилган 50МП асосий сенсор, 3х оптик зум қилиш қобилятига эга бўлган 10МП телефото ва 12МП ултра-кенг камералар мавжуд. Улар билан 8К&30fps ёки 1080p&120fps видеолар олиш имконини беради.

Galaxy S23 Ultra, сериянинг "қирол" модели бошқа моделларники билан бир хил чипсетга эга, лекин бошқа томонларда анча яхшироқ техник хусусиятларга эга. Ultra'нинг 6.8 дюймли QHD+ экрани пастки моделларники каби янгиланиш тезлиги, ҳамда, максимал ёруғлик хусусиятларини таклиф қилади, албатта, S Pen қўллаб-қувватланиши билан бирга. Қурилма худди "раҳматли" Note смартфонлари каби S ручкасини ўз бағрига олган. Таъкидлаш жоизки, дисплей ён томонлари бирозгина эгилган, бироқ у Galaxy S22 Ultra'га нисбатан сезиларли даражада текисроқ экранга эга.

Ultra'ни янада "Ultra" қиладиган янгилик эса унинг камерасида: 200МП асосий камера янада кўпроқ деталларга эга тасвирлар олиш имконини беради. Ушбу мослашувчан тетра-пиксел сенсор ёруғлик кам бўлганида ҳам аниқ ва тиниқ суратлар олиш учун 16 пикселларни бирлаштириш билан 12 мегапикселли ёрқин суратлар, стандарт ёруғлик шароитларида эса 4 та пикселларни бирлаштириш билан эса 50 мегапикселли суратлар олиш қобилятига эга. Бундан ташқари орқа камералар схемаси 12МП ултра-кенг ва иккита – бири 3х, бошқаси 10х бўлган 10МП телефото линзаларни ўз ичига олади. Буларнинг барчаси 5,000 мА/соат батареядан қувват олади. Батареянинг ўзи эса 45 Вт тезликда зарядланади.

Яна бир сезиларли ўзгариш смартфонлар хотирасида. Фақатгина Galaxy S23'нинг ўзи 128 ГБ базовий хотира билан бошланади, Plus ва Ultra моделлар эса 256 ГБ. Икки юқори моделларнинг 512 ГБ хотира вариантлиси ҳам мавжуд. Ultra модел, шунингдек, 1ТБ хотира билан ҳам таклиф қилинади. Ultra'нинг 512 ГБ ва 1 ТБ вариантлиларини 12 ГБ, қолган барча моделларни эса 8 ГБ оператив хотира билан топишингиз мумкин.

Кутилганидек, смартфонлар One UI 5.1 янгиланиши билан бирга келади ва улар тўрт йиллик операцион тизим, ҳамда, 5 йиллик хавфсизлик янгиланишларини қабул қилишади.

Қўшимчасига шуни айтиш мумкинки, барча смартфонлар Gorilla Glass Victus 2 билан ҳимояланган, Wi-Fi 6E технологиясини қўллаб-қувватлайди ва экран остида ултрасоник бармоқ изини аниқлаш сенсори билан таъминланган.

Смартфонлар қора, яшил, лавендер ва крем рангларида чиқарилган. Нархларига келадиган бўлсак, Galaxy S23 модели 799, Galaxy S23+ модели 999 ва Galaxy S23 Ultra модели 1199 доллардан бошланади. Уларга Ўзбекистонда ҳам Samsung расмий сайтидан ҳозирдан буюртма бериш мумкин.

ЎҚИНГ: Instagram асосчилари янги ижтимоий тармоқ билан қайтишмоқда