Бу йил қандай iPhone’лар чиқиши аниқ бўлди
Apple оламининг энг нуфузли таҳлилчиси 2018 йилнинг кузида қандай iPhone моделлари чиқишини айтди. KGI Securities компанияси вакили Минг-Чи Куо (Ming-Chi Kuo) эълон қилган докладга кўра, сентябрда купертинолик гигант яна учта смартфон тақдим этади: 6,1 дюймлик, суюқ кристалли дисплейга эга iPhone, 5,8 ва 6,5 дюймлик OLED-дисплейли иккита iPhone.
ЎҚИНГ: Ниҳоят, энди iPhone’лар ҳам иккита SIM-картали бўлади!
Таҳлилчининг сўзларига кўра, янги смартфонлар «ҳақиқий суперцикл»ни бошлаб беради. Таъкидлаш керакки, Минг-Чи Куо бир йил аввал худди шу тарзда iPhone 8, iPhone 8 Plus ҳамда iPhone X тақдим этилишини ва уларнинг асосий хусусиятларини прогноз қилган ва бу тўғри чиққанди.
Яна учта iPhone
Минг-Чи Куо прогнозига кўра, диагонали 6,1 дюймга тенг суюқ кристалли iPhone янги моделлар орасида энг арзони бўлади. Дизайнига кўра у iPhone X’га ўхшайди. Шу тариқа, Apple смартфонларининг iPhone 6-8 услубидаги қиёфаси ўтмишга айланади.
5,8 дюймлик OLED-дисплейга эга iPhone эса бевосита iPhone X’нинг издоши бўлади. Эҳтимол, унинг нархи ҳам ошмасдан, 1000 АҚШ долларидан бошланиши мумкин. Диагонали 6,5 дюймга тенг модель эса «iPhone X Plus» деб номланади; у iPhone X’нинг барча хусусиятларидан ташқари, каттароқ дисплей ва янада кучли камерага эга бўлади.
ЎҚИНГ: iPhone X ва бошқа айфонларнинг сўмдаги нархлари (2018 йил 13 январь)
Купертиноликка омад кулиб боқади
Куо ишонадики, янги iPhone’лар кўплаб турли сабабларга кўра жуда оммалашади. Биринчи навбатда, Apple сотувларининг ҳақиқий суперцикли айнан 2018 йилда бошланади. Смартфонларнинг эски дизайнидан буткул воз кечиш ҳамда янги – iPhone X услубига ўтиш ҳам савдога ижобий таъсир этади. Айфонлар оммалашувининг яна бир асосий сабаби буткул янгиланган, янги дизайнда бўлса ҳам iPhone X’дан арзон 6,1 дюймли iPhone чиқарилиши бўлади.
Буларнинг натижасида, дейди Куо, бу йил смартфонлар савдосидан Apple оладиган даромад тахминан 10 фоизга ўсади. Бошқа таҳлилчилар купертинолик гигантнинг смартфонлари савдоси бу йил 5 фоизга ўсиши ёки 5 фоизга камайишини прогноз қилмоқдалар. Аммо KGI Securities мутахассисига ишонч кўпроқ, зеро, кейинги бир неча йил мобайнида у аниқ чиқувчи прогнозлари билан шуҳрат қозонган.
ЎҚИНГ: Samsung, Apple, Xiaomi ва Huawei ҳар бир смартфондан қанча соф даромад кўради?
