Бугун “наушник”, эртага қулоқ аппарати…

Наушник (ўзбекчасига – қулоқчин) – жуда қулай нарса. Бироқ ёшликдан наушник билан ошно бўлганларда 30 ёшга келиб, эшитиш ўткирлиги худди 60 ёш одамникидек бўлиб қолади.

Эшитиш ҳам пасаяр борган сари…

Мусиқани баланд овозда қанчалик узоқ эшитсангиз – эшитиш ёмонлашади. Эшитиш ёмонлашгани сари овоз баландлигини яна ҳам кўтаришга тўғри келади. Шундай қилиб эшитиши борган сари пасайиб кетаверади. Албатта, вақт ўтиши билан одамнинг эшитиш ўткирлиги тикланади. Лекин бунинг учун маълум муддатгача наушникдан фойдаланмаслик керак.

Товуш қанчалик баланд бўлса, унинг эштишга таъсири шунчалик кучли бўлади. Одам учун безарар бўлган товуш даражаси 60 Дб гача. Мисол учун тинч хонада ўтирганда одам 3 дб гача бўлган товушларни эшитади. Шовқинсиз хонада суҳбатлашганда товуш баландлиги 40 Дбгача кўтарилади. Бундан баланд товушлар сизга зарарли таъсир кўрсатади. Кўчадаги шовқин 70 Дб га, метро шовқини 80 Дб га, учиб кетаётган самолёт шовқини 120 Дб га тенг.

Наушниклардаги шовқин эса 110 Дб га тенг. Уларни кун давомида тақиб юрманг. Сабаби, кейинчалик сизга эшитиш аппарати керак бўлиб қолиши мумкин.

Хавфсизлик қоидалари:

1. Мусиқани эшитишда максимал товуш баландлигининг 60% дан фойдаланинг.

2. Агар ёнингиздаги одам сиз эшитаётган мусиқани илғай олса, демак, сиз меъёрдан кўра, баландроқ товушда мусиқа эшитмоқдасиз. Товуш баландлигини пасайтиринг.

3. Наушник таққанингизда, атрофдагиларнинг овози бутунлай эшитилмай қоляптими? Демак, бу ҳолатда ҳам сиз меъёрни ошириб юборяпсиз.

4. Сифатли наушник сотиб олинг.

5. Кўчада, айниқса машиналар қатнайдиган йўлларни кесиб ўтаётганда, наушникни ечиб қўйинг. Бу сизнинг хавфсизлигингиз учун жуда муҳимдир.

6. Наушниклардан бир кунда 1 соатдан ортиқроқ фойдаланманг.

Манба: Darakchi.uz