Бунақаси бўлмаган: Galaxy A6 смартфонидан аввал унинг видеоқўлланмаси чиқди!
Samsung компаниясининг кўпчилик кутаётган навбатдаги смартфонлари – Galaxy A6 ҳамда Galaxy A6 Plus моделларининг тақдимот санаси ҳануз аниқ эмас. Бироқ бу девайсларнинг турли жиҳатлари ҳақидаги маълумотлар, уларнинг суратлари ва рендер видеолари ҳам тарқалган.
ЎҚИНГ: Ҳали тақдим этилмаган Galaxy A6+’ни илк видеода кўринг!
Жанубий кореялик техногигантнинг расмий дўконларидан бири эса аллақачон Galaxy A6 русумли телефонини ишлатиш ҳақида видеоролик ҳам суратга олишибди. Унда мазкур смартфоннинг асосий функциялари ҳам санаб, улардан қандай фойдаланиш кўрсатиб берилган.
Атайлабми ёки бехосданми, хуллас, ушбу видеоқўлланмани интернетга ҳам чиқариб юборишибди. Келинг, мазкур видеолавҳани бирга томоша қиламиз:
Кўрганингиздек, бу ерда Samsung ходимаси Galaxy A6 моделининг бир қатор «фишка»ларини баён этган. Бунда асосий эътибор камераларнинг имкониятларига қаратилган. Улар орасида AR-стикерлар, олд камерада чақноқ ёрдамида селфи олиш кабилар алоҳида таъкидланган.
Видеороликда таъкидланишича, бу смартфоннинг ҳар иккала камераси 16 мегапикселлик датчикка эга. Шунингдек, Galaxy A6 диагоналига 5,6 дюймлик, томонлари ўзаро 18,5:9 нисбатдаги Super AMOLED-дисплей билан таъминланганлиги ҳам тасдиқланган.
Гарчи Galaxy A6 ҳамда Galaxy A6+ моделларининг қачон тақдим этилиши ва бозорга чиқарилиш санаси, шунингдек нархи ҳозирча аниқ бўлмаса-да, Samsung компаниясининг айрим моделлардаги смартфонларини юртимизда ҳам харид қилиш мумкин.
