Бунақаси бўлмаган: iPhone’дан барча тугмачалар ва қувватлаш порти олиб ташланади!

Смартфонсозлик саноатида кўпинча Apple корпорацияси турли технологияларнинг илк татбиқ этувчиси ҳисобланишини биламиз. Мобил қурилмаларидан қулоқчин тирқиши, «Уйга» тугмачаси ва бошқа айрим элементларни биринчи бўлиб олиб ташлаган ҳам шу компания бўлади, қолганлар эса унга эргашишади.

ЎҚИНГ: iPhone кўз ҳаракати билан бошқарилади

Купертиноликлар энди ўз смартфонлари корпусидаги моддий элементларни янада қисқартиришга ҳаракат қилишмоқда, деб ёзади PhoneArena нашри. Яъни, келажакда iPhone’лардаги кабел уланувчи Lightning тирқиши бўлмайди. Шунингдек, айфонлар моддий тугмачаларидан ҳам маҳрум қилинади.

Яқинда Bloomberg нашри томонидан эълон қилинган маълумотга кўра, Apple аллақачон бунга жиддий киришган, аммо мазкур ғоя вақтинчалик кечиктирилган. Чунки ҳали симсиз қувватлаш технологиясининг ўзи ҳам такомиллаштиришга муҳтож. Яна бир томони – жамланманинг таркибий қисми сифатида смартфоннинг қадоғига симсиз қувватлаш ускунасини ҳам солиш унинг нархи янада ошишига олиб келади. Ёки Apple уни алоҳида сотишни режалаштирганмикан?

ЎҚИНГ: iPhone X таннархи ҳисобланди: қийматнинг 74 фоизи Apple’нинг фойдаси экан!

Вазият билан таниш манбаларнинг хабар беришларига кўра, Apple корпорацияси 2019 йилги айфонларида USB Type-C портини қўллашни режалаштирган. Афтидан, бу ҳам узоқ муддат давом этмаса керак – ахир, купертиноликлар умуман портсиз ва тугмачасиз iPhone чиқаришни кўзлашмоқда.

Таъкидлаб ўтиш ўринлики, iPhone ва iPad’ларда ҳамиша бошқа компаниялар маҳсулотларидан фарқ қилувчи – ўзигагина хос портлар бўлган. Жумладан, 2007 йилги илк айфондан бошлаб то iPhone 4s моделигача 30 контактли тирқиш қўлланган. 2012 йилнинг 12 сентябрида эса, iPhone 5 билан бирга Lightning порти ҳам тақдим этилган. Ўша куни намойиш этилган тўртинчи авлод Apple iPad эса, Lightning-тирқиш билан жиҳозланган илк планшет эди.

ЎҚИНГ: iPhone 9’нинг илк суратлари ва видеоси: сканер экраннинг ўзида!