БУНАҚАСИ БЎЛМАГАН: «оқ хакер» Цукербергнинг Facebook-саҳифасини шу тармоқдаги жонли эфирда бузиб ташлашга сўз берди!
Дунё бўйича энг оммалашган ижтимоий тармоқ – Facebook’да, табиийки, хавфсизликка катта аҳамият қаратишади. Шунга қарамай, унда ҳам хакерлар ҳужуми уюштирилиб туради.
ЎҚИНГ: АҚШ Конгрессида кўрсатма берган Цукерберг: «Ўзимни ҳам чув туширишди...»
Тайванлик «оқ хакер» Чан Чи-янь (Chang Chi-yuan) бугун – 28 сентябрда антиқа даъво билан чиқди. Таъкидлашича, навбатдаги якшанба – 30 сентябрь санасида у Facebook асосчиси ва раҳбари Марк Цукербергнинг айни шу платформадаги саҳифасига ҳужум қилиб, уни ўчириб ташламоқчи! Тағин, ушбу жараённинг оммавий намойишини ҳам эълон қилди: уни ўз Facebook-аккаунти орқали жонли эфирга узатиб турмоқчи!
Facebook’да 26 мингдан ошиқ обуначиларга эга бўлган Чан Чи-янь ўз ватанида жуда машҳур шахсдир, дейилади хабарларда. У аввал ҳам оммабоп платформаларнинг ҳимоясидаги «тирқиш»ларни пул эвазига топиб бериш билан шуғулланиб келган. Дарвоқе, Facebook’да ҳам баглар ва ҳимоядаги заифликларни излаш бўйича мунтазам дастур йўлга қўйилган. Бу борадаги хатоликларни топиб, хизмат кўрсатиш марказига хабар қилган хавфсизлик мутахассислари рағбатлантирилади.
Дарвоқе, агарда Facebook’нинг ўзи блоклаб қўймаса, Чан Чи-янь «томоша»сини 2018 йилнинг 30 сентябри – якшанба куни, Тошкент вақти билан соат 15:00 да мана бу манзил орқали кўришингиз мумкин бўлади.
