Бунга нима дейсан Realme? – смартфонни 300 Вт тезликда қувватлаш технологияси кўрсатилди!

Смартфон ишлаб чиқарувчилари, айниқса, хитойлик таниқли брендлар яқин йиллардан бери телефонни тезкор зарядлаш пойгасини ўйнаб келишмоқда ва ҳозирда Realme ўзининг 240 Вт тезликдаги қувватлаш тезлиги билан пешқадамлик қилиб келаётган эди. Эди. Аммо, бугун Xiaomi'нинг Redmi бренди 300 Вт тезликдаги зарядланиш технологияси билан Realme'дан анча олдинга ўзиб кетди.

Маълум бўлишича, Барселонада бўлиб ўтаётган MWC 2023 тадбири давомида Redmi ўзининг янги зарядланиш технологиясини намойиш этган. Улашилган демо видеода сиз Redmi Note 12 Pro+ ёхуд Discovery Edition 300 Вт тезлик билан 0 дан 100 гача атиги 5 дақиқада қувватланишини кўришингиз мумкин.

Таъкидлаш жоизки, смартфон батареяси бу ерда 4100 мА/соат ва у 43 сонияда 10%, 2 дақиқада эса 50% қувватланди. Расмий маълумотларга қараганда янги зарядлаш технологияси аслида 300 Вт дан бироз камроқ – максимал 290 Вт атрофида.

Айтиш керакки, Redmi'нинг ушбу 300 Вт қувватланиш технологияси тезлиги фақат тест режимида намойиш этилган ва ундан келажакдаги смартфонларда фойдаланиш ҳақида маълумотлар ҳозирча очиқланмаган.

ЎҚИНГ: Xiaomi ўзининг глобал фойдаланувчилари учун "камбағал" MIUI 14 операцион тизимини тақдим қилди