Cамолётдан тушиб кетган iPhone'га нима бўлди?
iPhone смартфони ердан 300 метр баландликдапарвоз қилаётган самолётдан тушиб кетди ва омон қолди. Бу тўғрида NBC телекомпаниясининг WBIR телеканали хабар бермоқда.
Смартфон эгаси дея айтилаётган Сарвиндер Наберхаус (Sarvinder Naberhaus) American Barnstormers тури давомида ретро-бипланда парвоз қилаётган бўлган. Айова (АҚШ) штатидаги Эймс аэропортида старт олган парвоз мобайнида сурат олишга уринган хонимнинг айфони кучли шамол туфайли деразадан пастга тушиб кетади.
Парвоз тугагач, Сарвиндер Наберхаус умид билан бошқа гаджетда «iPhone қурилмасини излаш» функциясини ёқади. Тизим шу заҳотиёқ унинг айфони шаҳарнинг шарқий қисмида эканидан ҳамда ишлаб турганидан хабар беради.
Айфонини топиш илинжида Сарвиндер хоним йўлга отланади. Қидириш ишлари вақтида айфонига овозли сигнал жўнатади. Жиринглаётган iPhone овози эса унинг умидларини ҳақиқатга айлантирди. Маълум бўлишича, телефон қалин ўт-ўлан устига бешикаст келиб тушган. Ҳатто бирор из тушмаган смартфон одатдагидай ишлашда давом этар эди.
2018 йилнинг июнида эса Man + River YouTube-каналида сув остида икки ҳафта қолиб кетган iPhone X флагмани топилгани ва унга шикаст етмагани эълон қилинган.
