Canalys: Иккинчи чоракда глобал компьютер бозори 13% га ўсди. Қайси компаниялар етакчи бўлди?

Canalys: Иккинчи чоракда глобал компьютер бозори 13% га ўсди. Қайси компаниялар етакчи бўлди?

Canalys таҳлил компанияси томонидан ўтказилган янги тадқиқот 2021 йилнинг иккинчи чорагидаги шахсий компьютерлар глобал савдосини таҳлил қилди. Ушбу тоифа қурилмалар қаторига десктоп компьютерлар, жумладан, моноблоклар, компьютер корпуслари, лептоплар ва Chromebook'лар киритилган.

ЎҚИНГ: 10 миллион сўмдан юқори бўлган ноутбук нархлари билан танишамиз

Кучли тижорий сегмент сабаб компьютерларга бўлган талаб юқори бўлди. Компонентлар таъминотидаги муаммолар ҳали ҳам саноат олдидаги муаммо бўлиб қолмоқда, бироқ камчилик ва кечикишлар кўлами камаймоқда.

Шахсий компьютерлар бозорида 2021 молия йилининг иккинчи чорагида йиллик 13% ўсиш кузатилди. Жами 82,3 миллион қурилма етказиб берилгани тахмин қилинмоқда. 20 миллион компьютер етказиб берган Lenovo чорак етакчиси бўлди. Компания ўтган йилнинг мос даврида 17,4 миллион қурилма етказиб берган эди. Шундай қилиб, Lenovo'нинг йиллик ўсиш кўрсаткичи 14,7%, бозор улуши эса 24,3% бўлди. 22,6% улуш билан HP иккинчи ўринни эгаллади. Компания чорак ичи 18,6 миллион компьютер сотиб, йиллик 2,8% ўсиш кўрсаткичини қайд этган.

Учинчи ўринда эса 17% лик улуш ва етказиб берилган 13,9 миллион компьютер билан Dell турибди. Apple эса 6,4 миллион қурилма сотиб, 7,8% улушга эга бўлди. Acer 7,3% улуш билан купертиноликлардан кейинги ўринни банд этди. Қолган ишлаб чиқарувчилар эса 17,3 миллион компьютер сотиб, бозорнинг 21% ини эгаллади.

Ушбу ўсиш, асосан, бизнесларнинг қайта тикланиши билан юзага келган тижорий сотув каналлари сабаб амалга ошган. Истиқболга назар ташласак, саноатда истеъмол савдоси секинлашиши, тижорий сотувлар эса ортишини кутиш мумкин.

Apple'нинг M1 компьютерлари бозорга чиқишда давом этиши билан компьютер бозори келаси йилга қадар ўсишда давом этишини кутиш мумкин. ChromeOS, macOS ва Windows 11 тизимларидаги дастур янгиланиши ҳам сотувлар ошишига олиб келиши тахмин қилинмоқда.

ЎҚИНГ: Windows 11 ўрнатиш учун компьютер ёки ноутбукингизга қўйиладиган талаблар

Сайт янгиликларидан доимий хабардор бўлиш учун Телеграм каналимизга қўшилинг!