CES 2020: «Яширин камера»ли илк смартфонни кутилмаган компания намойиш қилди (+видео)
Xiaomi корпорацияси Mi Mix 4 смартфонида «яширин камера технологияси» қўллаётганидан хабарингиз бор. Oppo ҳам айнан шундай технологияга эга смартфон прототипининг «жонли» видеосини тарқатган. Шунингдек, Samsung ҳам янги моделларига бу технологияни жорий этмоқчи ва уни Samsung UDC (under-display camera – экраности камера) дея номламоқда.
ЎҚИНГ: Ваҳимачилар учун махсус: яширин камераларни аниқловчи «анти-жосус» гаджет яратилди! (+видео)
Лекин шунақа – ишлатилмай турганида ғойиб бўлувчи камерали биринчи смартфонни улардан ҳам аввал OnePlus расман тақдим этди. CES 2020 кўргазмасида кўрсатилган ушбу қурилма ҳали концептуал смартфон бўлиб, Concept One деб номланган.
Компания бундай смартфон тайёрлаётганини илк бор декабрда тилга олганди, аммо унинг тафсилотлари эндигина маълум бўлди. Мазкур смартфон ғойиб бўлувчи олд камерага эга биринчи қурилма бўлиши кутилаётганди, аммо аслида бошқача бўлиб чиқди. Яъни, унда юқоридаги смартфонсозлар кўзлаётганидек селфи-камера эмас, балки орқа панелдаги бош камера яширинувчи ҳисобланади.
ЎҚИНГ: Xiaomi «яширин камерали» Mi Mix 4 флагманининг тақдимот кунини эълон қилди
Қуйидаги расмий видеода OnePlus Concept One смартфонини батафсил томоша қилишингиз мумкин:
Кўриб турганингиздек, OnePlus Concept One бош камераси модуллари деярли кўринмас бўлиб яширина олади. Бундай эффектга эса унинг устидаги электрохром шиша орқали эришилган – у шаффоф ёки тўқранг бўла олади. Тусни ўзгартириш жараёни 0,7 сония вақт олади. Лекин камера барибир тўлиқ кўринмас бўла олмайди маълум бир бурчак остида қараганда, ҳатто «яширин» режимда ҳам модуллар кўзга ташланади.
OnePlus Concept One умумий дизайни McLaren услубида ишланган, смартфоннинг корпусида ушбу бренд логотипи қўлланган, орқа панелга чарм қопланган. Бироқ компания бу маҳсулотини ҳозирча савдога чиқармоқчи эмас – уни шунчаки концептуал смартфон сифатида кўрсатган.
