ChatGPT Telegram'га интеграция қилиниши мумкин (видео)

ChatGPT Telegram'га интеграция қилиниши мумкин (видео)

Бир неча ойдан бери Интернет халқи оғзидан тушмаётган ChatGPT сунъий интеллект чатботи тез орада Telegram мессенжерига интеграция қилиниши мумкин.

Ҳозирда Telegram'да ChatGPT API'дан фойдаланилиб яратилган кўплаб ботларни топиш мумкин. Бироқ, уларнинг ҳеч қайси бири расмий ChatGPT эмас. Интернетда тарқалган расмийга ўхшаш видео эса ChatGPT ва Telegram логотиплари қўшилаётганини кўрсатади ва бу эҳтимол икки сервиснинг бирлашаётганига ишора бўлиши мумкин.

Афсуски ҳозирча хизматлар интеграциялашуви қандай кўринишда бўлиши ва бу қачон амалга оширилиши номаълум. Бироқ, видео интернетда тарқалган экан, демак, бунинг устида ишлаш бошланган ва биз янгиликни узоқ кутмаймиз.

ChatGPT интеграциялашувидан ташқари Telegram ўзининг Premium обунасига яна бир хусусият қўшаётган кўринади – Telegram'нинг расмий таржималар платформасида янги маълумот пайдо бўлди. Унга кўра, келажакда баъзи давлатлардаги Telegram фойдаланувчилари ўзларининг электрон почталарини бир марталик SMS код билан reset қилиш учун Premium аккаунтга эга бўлишлари керак бўлади.

Мамлакатингизда SMS нархи юқори бўлганлиги сабабли ушбу электрон почтани SMS код орқали қайта ўрнатиш учун сизда **Telegram Premium** аккаунт бўлиши керак.

Сиз дўстингиздан аккаунтингиз учун Premium обунасини совға қилишни сўрашингиз мумкин

Маълум бўлишича, ушбу функсия аккаунтига бир ойда бир неча марта кириб чиқадиганлар учун бўлиб, бунда фойдаланувчи давлатидаги SMS нархининг қимматлиги сабаб улардан аккаунтга киришда бир марталик SMS кодни тўғридан-тўғри телефонга эмас, балки электрон почта орқали код олиш талаб қилиниши мумкин.

Бундан ташқари Android учун Telegram'нинг бета версиясида папкадаги чатларни ўқилган қилиш (бу сўнгги янгиланишда iOS учун аллақачон қўшилган), ботларда янги дизайндаги Start тугмаси ва хотирани тозалаш жараёни учун янги анимацияли ойна пайдо бўлди. Улар кейинги янгиланиш билан иловага қўшилиши кутилмоқда.