Clips иловасига Disney ва Pixar қаҳрамонлари қўшилди
Apple компанияси iPhone ҳамда iPad’ларда видеомонтаж қилишга мўлжалланган Clips иловаси учун янгиланишни чиқарди. Бу хусусда компания сайти маълумотларга таяниб Ferra.ru хабар бермоқда.
Хабарга кўра, бу апдейтда дастурга ўнлаб чизилган қаҳрамонлар ва откриткалар жорий этилган. Улар орасида Disney ҳамда Pixar мультфильмларининг персонажлари ҳам бор.
Қисқача айтганда, энди iPhone ва iPad эгалари Clips иловаси орқали ўз видеолавҳаларига Disney ҳамда Pixar классик қаҳрамонларини қўшишлари мумкин. Clips 1.1 версиясида Микки Маус, Минни Маус, Дональд Дак ва Дейзи Дак кабиларнинг, шунингдек, Pixar’нинг «Ўйинчоқлар тарихи» ва «Бошқотирма» мультфильмлари қаҳрамонларининг анимацияли шаклларини қўша оладилар. Персонажлар жамланмасини Disney томонидан яратилган анмацияли откриткалар янада бойитган. Уларни видеоларга безак (заставка) тарзида қўшиш имкони мавжуд.
Булардан ташқари, Clips’да Apple томонидан яратилган ўнта янги персонаж, Disney ёки Pixar’га алоқаси бўлмаган 12 та откритка ҳам пайдо бўлган. Улар орасида жилваланиб турувчи сув сатҳидан тортиб отилувчи тутун ва жонлантирилган уч ўлчамли тасвирларгача бор.
Clips иловаси шу йилнинг апрелида тақдим этилган ва iPhone учун апрель ойидаги энг яхши иловалар рўйхатига кирган. Уни iOS тизимли қурилмалар учун App Store дўконидан бепул юклаб олиш мумкин.
